Zarzokima thahnaa inhnamhnawiha puh R Laldawngliana bail-in a chhuak mek

Zarzokima, Bungthuam thahnaa inhnamhnawiha puh police-ten kumin January thlaa an man, R Laldawngliana (42), Meidum, Mizoram Bru Displaces Peoples' Forum-a General Secretary chu bail-in a chhuak mek. R Laldawngliana hi kumin January 23 khan Kanhmunah man a ni.

Mizoram sorkar ukilte hnen atanga Vanglaini  thu dawn danin, R Laldawngliana hi Chief Judicial Magistrate, Vanlalchami thutna Court chuan ukil SL Thansanga ngenna angin, March 16 khan medical ground-in bail-a a chhuah a phalsak a, mahse bail-a a chhuah hun tak chu March 19 a ni.

Laldawngliana bail-tu hi Govt. Meidum Middle School-a zirtirtu, W Vanlalruala s/o. Birkhoram a ni a; Court-in bail-a chhuah a phal chhan ber, medical certificate siamtu hi Dr C Reang, Medical Officer, Ananda Bazar PHC, Tripura North a ni. A bail-tu doctor chuan, Laldawngliana hian a lung (heart) lamah harsatna a nei niin a tarlang.

R Laldawngliana bail-na thuchhuak hi Court sang zawk, Additional District & Sessions Judge, Saingura Sailo hnenah khin lêt a ni a; Additional District & Sessions Judge chuan, Laldawngliana bail-na thupek hi March 23-ah a sût lailâwkna thupek a tichhuak ve thung. Hei vang hian Laldawngliana hi police-ten an man leh nghal thei tih sorkar ukilte chuan Vanglaini an hrilh.

R Laldawngliana bail chungchang hi March 31 khan ngaihtuah leh tura ruahman lâwk a ni a, mahse Court lam remchan lohna avangin a hun sawn niin, tun thlengin ngaihtuah a la ni rih lo.

Hetih lai hian, March 31-a Khakchangpara Bru refugee camp bula an ruang chhar chu Zarzokima thahnaa silai hmet pertu ber nia hriat, Thankima ngei a ni tih finfiah a ni.

Special Investigation Team hruaitu, H Zosangliana sawi danin, Thankima man tur hian March 29 khan Tripura an pan a, mahse March 31 zingah Thankima ruang chhar a ni tih thu an dawn hnuah, amah ngeiin a enfiah a, Thankima ngei a ni tih an hre ta a ni. Thankima hi kah hlum a ni a, kah hlum a nih chhan hi Tripura Police-te'n an chhui mek a ni.

Thulakna: Vanglaini