YMA President-in Mizote Ral Tial Tial A Hlau

12/03/2010 16:43

Mizo Aw : Central YMA President Pu Lalchungnunga chuan nimina Aizawl Lammuala Chapchar Kut hmannaah inlawmna thu a sawipahin thalaite chu hnathawhna chang hriatnaah har thar turin a chah. Chapchar Kût lo hmang hmasatu Mizote pi leh pute chuan an dama, mi pangngai an nih phawt chuan kumtluanin hna tangkai an thawka, an awm mai mai ngai lo a ni a ti a. "Kan ramah hnam dangten thawh sên loh hna an hmuh laia a ram neitu, a bik takin thalaiten hnathawh chu sawi loh, zing thawh tak ngial pawh kan peih ta lo hi Chapchar Kût hmuchhuaktute zia a ni ngai lo. Kumtluana awllen hun hman hi intodelh lohna leh tâm hmahruai a ni. Kan meng reia kan tho tlai a nih pawhin hna tangkai kan thawh vang ni se a va duhawm êm" a ti a. "Kan rama ram dang mi leh hnam dang mite thawh âi zawng zawng hi thawk vek ni ila, thawh tur nei lo chuan kan ramah an awm reng peih hauh lovang" a ti.

YMA President chuan "Kan pi leh puten Chapchar Kût an hman thin kan entawn a nih rau rau chuan, a hlimhlawp lai chauh ni lovin, kawla ni chhuak chhiarin hna tangkai an thawk a, an awm mai mai ngai lo tih hi i entawn tel ang u" a ti. khai.

Mizo zingah thalai hrisel, zir sang, mahse, ‘thatchhia’ an tam tih sawiin tamna tha lo, tamna chhuanawm lo a a ti a. "Hetianga a tha lo zawnga tumbu thana kan than zel chuan, kan upa tulh tulh anga, kan tê tulh tulh anga, kan ral der ang tih a hlauhawm. Sum hmanna tur hriat leh hman tur thawh chhuah peih si loh hi thil inkalh tlat a ni" a ti. Chapchar Kût chu hnathawhna chang hre tura thalaite fuih thartu, kût hlimawm leh hriatreng tlak ni se a duh thu YMA President chuan a sawi.