Wikileaks Neitu Julian Assange-a Bail Chhuak,Buaipui Tham Wikileaks

Australian journalist, publisher, Internet activist, US sipai lehkha pawimawh pho chhuaktu,  Wikileak website neitu - Julian Assange-a chu ni 16 December 2010, Ningani khan Lindon court chuan bail(chhuah ) a phalsak. Julian Assange-a hi  ni 14 December 2010, Thawhlehni khan London court chuan bail a phalsak a, nimahsela, Sweden lam atanga duhlotuten rorelna sang zawka chhawm (appeal ) an file nghal vat avangin court chuan he thu hi a ngaihtuah nawn lehin, bail phalsakna hi nemngheh a ni ta a ni.

Julian Assange-a hi rorelna chuan security 200,000 pounds ($315,000 vel) leh sureties 40,000 pounds ($63,000 vel) dah khamin bail chhuah theih turin court chuan thu a titlu a ni. Rorelna chuan  Julian Assange-a zawm ngei tur dan -  British army officer Vaughan Smith-a ina awm,  electronic tag (hnuchhui mai theihna electronic kekual, ngun, thi ang deuh ) bun/ha/ awrh leh ni tin tlai lam dar 6 – 8 inkara police hnena in report ziah te a siam a ni. Tin, a passport chu police te kutah dah tur a ni a, ni 11 January 2011-ah Julian Assange-a hi court-ah a inlan leh ang. Julian Assange-a thubuai ngaihtuah rorel lai hian court pawn lamah Julian Assange-a thlawptu mi 100 vel chu lehkha leh ilo kengin, an au thup thup a ni.

Kum 39-a upa Julian Assange-a hi Sweden-a hmeichhe khuaikhem thubuai vangin Sweden chuan manna thu tichhuakin, Interpol-in a awmna apiangah manna thupek a tichhuak a. Ni 7 December 2010 khan US lehkha pawimawh a pho chhuah avanga inven thu-hlaa a bik bona hmun atang chhuakin London Police te kutah a inpe ta a ni.

Wikileak hian April 2010 khan Iraq rama US sipaiten chanchinbu mi leh pawisawi lo mipuite an thah lai video a tichhuak a, July-ah US leh a hruihhruaiten Afghanistan-a an raldo thuhla lehkha pawimawh  76,900 lai a tichhuak bawk a ni. October-ah Iraq rama ralbeih chungchang lehkha pawimawh 400,000 zet a tichhuak leh a, November atang khan US leh ram dang inkar boruak, US-in ram dang a dawr dan boruak, US thuruk lehkha pawimawh a tichhuak leh tan a, hetiang hian Julian Assange-a hian buaina a tawk ta a ni.

US sorkar chuan Julian Assange-a hi vawi tam a hau tawh a, US lehkha pawimawh a pho chhuah avang hian mi firfiak ang hiala ngaitu leh thubuai siamsak duhtu pawh US sorkar hotute zingah an awm nual bawk. Chutiang a nih avang chuan, mi tam tak chuan tun tuma Julian Assange-a’n thubuai a neih dan leh man a nih chungchangah hian US sorkar hi a inrawlh ruk ngei an ring.

Khawvel sorkar thenkhat chuan hetianga Wikileak-in US lehkha thuruk pawimawh a tihchhuah avang hian, US sorkar chu an dem hle. Wikileak hian engtin nge he’ng zozaia tam US sorkar lehkha pawimawh hi a neih theih? tih hi CIA leh mithiam dangte ngaihtuah titamtu a ni. CIA General director hmasa, Michael Hayden-a chuan Wikileak hian la phawrhchhuah loh lehkha pawimawh 750,000 a la neih a rin thu a sawi.

Thulakna:

• Wikileak
• BBC
• Al Jazeera
• CNN
• Wikipedia
• Above Top Secret