Mizo Students Union (MSU) chuan Mizoram University-a zirtirtu hrang hrang lakna turah University thuneitute chuan nikum September ni 15-a inremna an lo siam chu bawhchhiat a ni tiin he inremna anga kal turin University thuneitute chu an ngen a. Vawiin chhun dar 12:00 thlenga an inremna anga an kal lo a nih chuan naktuk atanga interview tura koh zawng zawngte chu tumah kal lo turin an hriattir.
Inrinni khan Aizawl Press Club-ah chanchinbumite kawmin MSU hruaitute chuan MZU Vice Chancellor Prof.A.N.Rai leh Registrar Pu Banjamin ‘kan nei’ lungchhiatthlak an tih thu an sawi a. An hming an ziah hnan ngei inremna an bawhchhiat avanga an chungah an lungawi loh thu an sawi. Prof.A.N.Rai chu a rang thei ang bera Mizoram chhuahsan se an duh thu an sawi a. Nikum september thlaa MZU leh MSU inremna hriatpuia hming ziaktu Prof.D.P.Tiwari leh Prof.R.P.Vadhera chu inremna a hlawhtlinna atana hma la lo tiin an nguntaka an enzui tur thu an puang bawk.
MSU chuan hetianga hma an lakna hi tute emaw tan leh Mizo a tam thei ang ber MZU-ah hian zirtirtu hna thawk tura dahluh tumna a ni lo a, dan ang thlap leh MZU-in thuneihna a neih anga ram leilung fate a tling leh tlak interview hmachhawn tura koh ve ni se an ti a ni an ti.
Nikum Sept. ni 15-a VC leh MSU inremna 1-na leh 2-naah chuan screening leh interview chu Mizo candidate-te duhsak zawnga tih a ni ang tih leh Asstt. Professor leh Professor hna ruakah tualchhung mite lak an nih theih nan remruatna siam a ni ang tih a chuang a ni.
MSU chuan zirtirtu hna hrang hrang thawk tur interview kohah VC leh Registrar chuan an duhsak zawng hnam dang lakluh theih nan thiamtakin ruahmanna an siam a, Class one pali nei + NET/M.Phil/Ph.D tih dan an siam chu University Ordinance leh UGC norms-ah pawh awm lo, tualchhung mite dan tumna a ni an ti. Hna lakna tur advertisement chhuah-ah chuan Asst. Professtor ni turin Master Degree leh NET neih a ngai tih chauh a ni an ti.
VC chu tun hmaah pawh Mizo tlangval pahnih academic record nei tha zawk hnawlin hnam dang a lo la tawh bawk niin an sawi a. A lokalna Banaras Hindu University ami duhsakna hlei hluak lantirin Mizopa Ph.D hnua international paper published 7 nei hnawlin a lo la tawh bawk niin an sawi. Prof.A.N.Rai hian BHU atangin MZU-ah hian mi 28 a lalut tawh a ni an ti. Tun tumah hian Mizo thalai Ph.D/JRF nei eng emawzat hnawl an ni an ti.
Thulakna: Mizo Aw