TUIKUK LAKAH MOVEMENT KALPUI INPEIH

VANGLAINI : MSU chuan, Tuikuk hruaitute chu Mizoram sorkar leh mipuite'n ruahmanna an siam ang ang zâwm mai tura an duh thu an sawi a; Tuikukin Mizote chungah harsatna an siam leh a nih chuan Democratic Movement kalpui an inpeih reng thu an sawi bawk.

MSU hruaitute hian nimin khan Aizawl Press Club-ah thuthar lakhawmtute kâwmin, Tuikuk chungchanga an rilru an puang a. MSU President, C Lalrosanga chuan, Tuikuk thil phut hrang hrangte chu tihhlawhtlin chia an ngaih loh thu sawiin, "Mizoram sorkar leh mipuite'n ruahmanna an siam ang hi zâwm mai rawh se," a ti a; Tuikukte chu hruai kîr an nih dawn pawhin, Mizoram himna ngaihtuaha NGO-te nen enfiah hmasak tha an tih thu leh, a huhoa dah an remtih loh thu a sawi.

MSU President chuan, Mizoram sorkar chu Mizo hnam himna ngaihtuah chunga fimkhur taka kal tura an phut thu sawiin, "Tuikukte'n Mizote chungah harsatna an siam leh a nih chuan Democratic Movement kalpui ve zel turin kan inpeih tih lo hre turin Tuikuk hruaitute kan chah a ni," a ti a; Mizote'n Tuikukte chungah harsatna an siam hmasak ngai loh thu leh, chuti chunga dâwta sorkar laipui leh Human Rights-ah Mizote an hêk thin thu a sawi bawk.

Mizoram leh Assam inrina chungchangah C Lalrosanga chuan, "Vawi eng emaw zat chingfel tura sorkar kan ngen hnuah pawh, hmalakna a la awm lo hi kan ram ngaihthahna lian takah kan ngai," a ti a. Tun hnaia Vairengte daia Zorammuani, Bilkhawthlir thah a nih tuma Mizoram Police-te hmalak dan tur hre loa an hawihâih thu leh, ramri avanga Mizo mipuite'n harsatna an tâwk leh a nih chuan sorkar mawhphurhnaa an ngaih tur thu a sawi bawk