Thli leh ruah vangin mi 2 thi; in 3105 chhia

Tun hnaia Zoram hmun hrang hranga thlipui tleh leh ruahsur avangin mi pahnihin nunna an chân. Serchhip-ah leh W Phailengah mi pakhat ve vein an thih phah a, Mizorama in chhia report Vanglaini-in a hriat theih chin chu 3,105 a ni.

March 30 zan dar 11:15 vel khan Serchhip IOC Venga TBC Zalawma (65) in chu an kawmchhak lama police quarters chung thlâwkin a déng a, inchung leh chhuat thenkhat a déng chhiain, TBC Zalawma leh a tupa, Lalhruaitluanga (3) mutna khum pawh kawmthlang lamah a hnâwl thla a; TBC Zalawma leh a tupa hi hliamin, Serchhip damdawi-in panpui an ni a, Zalawma chu a hliam tuar loin nimin zing dar 2:15 khan a thi.

Serchhip DC, H Darzika chuan Zalawma chhungte hnenah nimin khan sorkar râlna Rs. 50,000 a hlan nghal.

W Phailengah pawh nimin zing dar 5 vel khan Belleikawn Venga Vanropuia (32) s/o Chhuahthanga chu an ram riahna thlámah an chhaka thingkung tluin a delh a, Vanropuia hi a hmunah a thi nghal a ni.

Tunhnaia thlipui, ruah leh rial vanga in chhia 3105  zinga 222 chu a chhe vek a, chhe nasa zual 291 leh a thenlai chhia 2223 a awm bawk.

Aizawl district-in an tuar nasa ber a, in 1171 a chhia a, chung zinga 11 chu a chhe vek a ni. Aizawl district-a in chhiatna khuate hi Darlawn, Sawleng, Sunhluchhip, Sailutar, Kepran, Serzawl, East Phaileng, Suangpuilawn, Phuaibuang, Phullen, Tuikhurhlu, Sesawng, Tlungvel, Thingsualthliah, Thingsul Tlangnuam, Tachhip, Muallungthu, Hualngohmun, Melriat, Lungleng-I, N. Lungleng leh Samtlang-te an ni. Aizawl district-ah hian hmarlam tlangdungin an tuar na zual.

Lunglei district-ah chuan in chhe vek 41 leh luah tlak loh khawpa chhia 433 a awm a, biak-in pathum (Zobawkah), sikul pasarih leh sorkar in dang pathum a chhe bawk.Lunglei district-ah hian khua leh veng 40-ah in chhia a awm.

Champhai DC sawi danin, Champhai district-ah chuan Khawzawlah in pahnih a chhe vek a, Lungtanah in 3, Khawhaiah in 2, Pamchungah in 2 a chhe vek bawk. Malsawmtluanga, Aiduzawl in chu thli leh ruah avanga electric current kalsualin March 30 zing dar 4 vel khan a tikâng a, a chhe vek bawk a ni.

Mamit district-ah pawh he khawpuia IPRO sawi danin, in 254 a chhia a; khua leh veng 13-ah in chhia hi a awm.

Kolasib district-ah chuan in chhia 534 a awm a, chung zinga 67 chu a chhe vek a ni.Kolasib district-a thli leh ruahin in a tihchhiatna khuate hi Bukpui, N. Chaltlang, Bairabi, Thingdawl, Bilkhawthlir, Buhchang, Phaisen, Thinglian, Saihapui, N. Chhimluang, Kolasib, Meidum, Kawnpui,Tawitaw, Bukvannei leh Zodin (Rastali) te an ni.

Serchhip district-ah chuan in chhia zawng zawng hi biak-in leh sorkar in telin 508 a ni a; in chhe vek 88, chhe nasa 11 leh chhe nual 388 a awm a, Bungtlangah sorkar in 11 leh Thenzawlah biak-in 10 a chhe tel bawk.

Lawngtlai district-ah chuan DC sawi danin, March 29 leh 30-a thlipui leh ruahsûr nasa avangin in panga a chhiat vek bakah, in 55 a chhe nual a ni.

Saiha district-ah chuan in 29 chhia a awm a, chung zinga pathum chu a chhe vek a ni. March 29-a rial tlain in 500 vel chung a tichhe bawk.

Thulakna: Vanglaini