Tarmit Bun Nge Vuah?

01/09/2010 12:00

- Rozama Chawngthu

Tarmit ka bun tih hi mi tamtakin hmang mahse tawng dika pawm theih ani chuang rih lo. Sikul naupangte hian exam naah chuan Mizo Tawng tih dik turah tarmit bun chu tarmit vuah tia thlakin mark an hmu zela, mahse a takah erawh chuan tarmit bun an ti leh thin. Tarmit hi bun chi anih lohzia kawng thum in han sawi teh ang.

1) Nghawng chin chung lamah engmah kan bun ngai lo. Thi kan awrh a, bengbeh kan beh a, lukhum kan khum a, diar kan khim thin. Tuna kan la hman ngai loh thil thar pawh hmang dawn ila, lu-ah anih chuan bun ani chuang lo vang.

2) Kut hmawr lam leh ke hmawr lamah kan bun thin. Ngun te, zungbun te, pheikhawk te, mawza te kan bun thin. Vai angin kan ban bulah hian thil kual dah duh ta ila, bun ala ni chuang lo vang. A thil azirin hreng emaw, vuah emaw tih atul tho vang, ban hmawr lam ni lo, a bul lamah kan dah dawn chuan bun a ni thei lo. Tarmit bun tur chuan banrekah emaw ngalrekah emaw dah a ngai dawn a, thil hmuh nan kan hmang hauh lo vang le.

3) Bun tur chuan, thil kual chhuak emaw, chhung nei emaw a nih a ngai. Chutiang zawng zawng chu bun vek ani chuang hek lo. Tarmit chu a kual chhuak lo. Tukkhum lama hren zawm chiin rawn siam ta se, bun ala ni chuang lo vang, vuah tih aiah hreng tih a tul zawk ang. Infiam mite pawhin an sam tih beh nan puanin lu an hreng thin, an bun ngai lo.

Thulakna: YMA Chanchinbu, Febuary 2009

Back