Tanhril Joint Action Committee chuan thuchhuah siamin, Tanhril Village Council Member Lalpiangliana thihna chungchanga mawhphurtu-a rinhlelh police 4-te tun thlenga zalen taka an awm chu Tanhril mipuiten hriatthiam har an tiin, heng miten anticipatory bail an dil chu hnawlsak ngei turin roreltu an phut tlat thu an tarlang.
Tanhril JAC thuchhuah chuan heng police 4 te hi bail phalsak an nih a, zalen taka an awm leh a nih chuan hma lak an tum thu an sawi a. He tual thihnaa inhnamhnawih nia rin civil mite thubuai siamsak loha an la awm reng chu mak an tiin, “Hriatthiam har kan ti takmeuh a. Heng mite pawh hi man a, dan ang taka an chungthu ngaihtuah thuai a nih kan phut bawk a ni,” an ti.
Mipuite himna tura an ngaih police-te kutah ram leh hnam a him zo ta lo-ah ngaiin, dikna hlenchhuak a, rang taka he thubuai chinfel a nih loh chuan Tanhril mipuite an chet ve mai a ngai dawn ni-ah kan ngai, an ti bawk.
Tanhril JAC hruaitute hi nimin khan Central YMA leh MZP office-ah lengin, Tanhril VC member thihna chungchangah hian hma lakpui turin an ngen tih thudawnna chuan a sawi.
Thulakna: The Zozam Times