Tahan Literacy Circle

Presbyterian Church of Myanmar(PCM) Kohhrana Literature & Publication Department hmalakna pakhatah chuan Extensive Communication Training Programme(ECTP) duan a ni a.

Hei hi, World Association for Christian Communication(WACC) tanpuinana ruahman a ni. He sum hmang hian Communication Trainning-te a buatsaih thin a. He sum hmang bawk hian khawtlang huap Kohhran thliar lovin Literature Seminar te, Writer’s Workshop te, Consultation te chu khaw hrang hrangah a buatsaih thin a. Heng thila convener chu fam khaw lama lawi ta (2000) Revd. Dr. L.R Bawla kha a ni.

Rev. Dr. L.R. Bawla kaihhruaina hnuaia a-kul-a-taia tangho chu Kohhhran hrang hrang Literature lama tui mite an ni hlawm a. Hetia literature lam tuimi bik sawm rual intelkhawm hian Kalay leh Kabaw phaiah kum sawm chhung teh meuh mai hi Seminar leh Literature lam hawia inpawlhona tha tawk tak tak buatsaihin an thawk tlang thin a. Tin, a tirah hming bik an pu lo na a, Mizoram lama thian thaten Tahan Literature Circle tia an rawn tih thin avangin herrem lehhertin Tahan Literary Circle (TLC) tih a lo ni ta a ni.

TLC hian Seminar leh Literature lam inpawlhona a buatsaih thin a, a senso tur chu PCM Kohhran atanga tum ni thin mah se, a chhawrtute erawh chu khawtlang huap, kohhhran hrang hranga mipuite an ni thin a. A ngahna hmun pawh a remchan angzia zel a, kohhhran hrang hranga nghah tawn a ni thin. A tlangpuiin mi 200 rual velin an hmang thin. Tin, Paper chhiar tur buatsaih a ni thin bawk a, an tui tlang mai pawh ni lovin, kan hlawkpui tak meuh thin a ni. Heng bakah hian TLC ho hian 1990 kum atang khan kum tin 30th November apiangin ‘Welcome December’ an hmang thin a, hei hi tun thlenga hman a la ni zel. Mi 150 bawr vel an kalkhawm thin a ni. Krismas lam hawi thuziak pahnih vel buatsaiha chhiar leh sawiho a ni thin a, ruai pawh thehin nilenga Krismas hlate sak ho a ni thin. He ruai sensote hi kohhran suma buatsaih a ni lova, mimal tlawmngaite thawhkhawm atanga buatsaih a ni ber.

2003 kumah erawh chuan ‘Zofate Krismas Kum 100 Lamtluang’ hman a ni. Hemi atan pawh hian Yangon, USA leh ram danga mite hnen atanga tanpuina dawngin Tahanah ropui taka hman a ni. Krismas lam hawi thu ziak tha lawrkhawmin a bu mawihnai taka khawrpum a ni. TLC thiltih dang leh chu chawimawina dawngte lawmpuina neih leh boral tate sunna buatsaih a ni thin. Mizo Literature khawvela kan hranghlui -J.F Laldailova, Zikpuii pa, Siamkima Khawlhring,R.Vanlawma,James Dokhuma, P.S Chawngthu, Lalsangzuali Sailo etc…..te pawh a sun nual tawh a ni. Heng sunnaahte hian mi 30-50 vel an kalkhawm thin a ni,

Tunah chuan a tira bul lo tantu leh a hnarkaitu Revd L.R.Bawla leh a tui mite an liam nual tawh a, a then hmun dangah awmhmun a lo khuar ve bawk nen. Kum 2003 khan ECTP Program pawh chu eng emaw vangin tihtawp hial a lo ni ta. Welcome December erawh hi chu a la nung a, an la phur tlang hlawm hle. Aug. 15, 2008 khan Kalay Kabaw huapin ‘Rokunga Lungdawh Lawmpuina’ hun hman a ni a, he senso erawh hi chu Rokung Memorial Society tanpuina vang liau liauva buatsaih a ni. Paper pahnih buatsaih a ni bawk. Mi 100 lai kalkhawmin Rokunga hla nilenga sakho a ni bawk. TLC –a thawkho-a a kul a taia tangte hi mi 10 rual vel a ni a. An vai hian kum 50 ral kai tawh vek an ni. Nihna chanvo hi rorela inthlan a awm ngai lo va, ruatchawpa inbel chawp mai an ni thin. Hengte hi an ni e:-

Pu Lalhmingthanga(Convener)
Pu F.Lalbiakmawia(Secretary)
Rev.Vankhuma(Treasurer)
Rev.Ngurnghaka
Pu F.Lalruata
Upa Lalmura
Pu Zorama
Maj. Lalthanga
Pu Vanhnuna

Hengte hi hranghlui lam deuh vek an ni hlawm a. Chuvangin, thangthar thalai deuhte nena inzawm thata thawhho dan hi ngaihtuah tha an tiin tul an ti ta.