May - June 2010 kha Tahan awmna Kalaymyo sorkar thuneitute chuan dan lova lak luh (Motor)Bike-te chu dan ang taka nemnghehna Licence siam hun a hawng a. Vawiin thleng hian Licence siam hun chhung hi khar a la ni lo. Ni tinin mi 200 vel meuh Licence siam tur hian an la intlar dul zel a ni.
Kalaymyo-ah hian Japan , China , Thailand , India siam Bike a rukin, harsa takin tawlh luh a ni thin a. Chu chu khawchhung mipuite tan a tangkaiin, thil tih leh veivah vel a awlsam phah hle a ni. Kum 2008 atang khan sorkar hian dan lova lak luh Bike tan Licence siam hun a hawng thin a, pawisa a ngen to thei hle.
Tun tum zet zawng Bike man aia tam Licence siam nan ngen a ni a, hei hian Tahan leh a chehvel (Kalaymyo) mite a ti-mangang hle a ni. China siam Super Cup Bike te hi Licence siam manah Kyats 300,000 (nuai thum) te zuk ngen a mawle! China Super Cup Bike hi Ks.250,000/- vela lei theih a ni. A engine number azirin a Licence siam man a inang lo. A tlangpuiin Ks. 300,000 – Ks.1,000,000/- a ni !
Keini Tahan leh a chhehvela awm Mizote zingah pawh he’ng Bike-te hi hmang kan tam hle tawh a, hetianga sorkar-in thu a han tihchhuah takah chuan siam lova awm ngam a ni si lo, a siamna man lah a to si, mi mangang tak tak an tam hle. Siam loh chuan sorkar-in a chhuhsak vek dawn, tih a ni si a, mi thenkhat chuan nei leh nei lo – mi ta pukchawp hialin Bike license an siam a ni.