SORKAR SUM RS VBC 68 LAPSE IN HOUSE A LUAH : Mawh ka phur a ni : Hawla

Chief Minister, Finance changtu ni bawk Lal Thanhawla chuan kum 2009-2010-a sorkar pawisa ‘lapse’ zat chu Rs. vbc 68,95,61,469/- a nih thu Assembly House a hrilh a, ‘he sum hi bo hlen tur ni lovin, kum 2010-11 plan-ah khung leh theih dan a awm niin mithiam ten an sawi,’ tih thu tarlangin, ‘sorkar lam atangin insawi thiam chi a ni lova, mawh ka phur a ni,’ tiin House a hrilh.

Sorkar plan pawisa hman lohva kir leh ta chungchangah hian nimin khan Hachhek bialtu Lalrinmawia Ralte chuan Assembly House-ah ‘Short Duration Discussion’ a pu lut a. Hemi chungchang sawihona-ah hian Chief Minister chuan, hetiang thil a thleng hi sorkar tan mualphona a nih rualin insiamthatna tura malsawmna (blessing in disguise) a ni thei niin a sawi a, mipui tan chi-ai lutukna tur a awm loh thu leh bo hlen tura ngaih tur a nih loh thu a sawi.

Tuna pawisa lapse hi Annual Plan Rs. vbc 1250 atanga chhutin a short fall hi 4% vel chauh a ni a, kum 2007-2008 khan Annual Plan Rs. vbc 855 atangin Rs. vbc 776 chiah hman a ni a, a short fall kha 9% lai a lo ni tawh a ni, Chief Minister chuan a ti a. Heng sum lapse ta hi re-validitate leh a, Annual Plan discussion May emaw June emaw-a Sublimentary Demand-ah telh leh theih beisei a nih thu a sawi bawk.

Chief Minister chuan financial system hman mek chu siamthat a ngaih thu sawiin, secretary-te hnenah financial power pek a tul thu te, treasury officer te power pek tam a tul thu te, SBI chauh ni lo bank dang hman mai te pawh a ngaih mai theih thu leh sum hman dan semzai ‘decentralization of financial power’ pawh hman mai a ngaih dawn thu a sawi a. ‘Pawisa hi bo hlen tura ngaih tur a ni lova, a chhe lai siamthatu nih kan tum angin heng thil dik lo siam tha a, pawisa awmsa pawh hmukir leh tura beih hi kan hna hmasa (top priority) a ni,’ tiin a sawi bawk a ni.

He discussion puluttu Lalrinmawia Ralte chuan, tunhma chuan hetiang bothlau-ah hian mipui ten engmah an sawi ngai lova, tunah chuan mipui ten thil an hriatthiam tawh avangin hetianga sorkar pawisa hman loha a luangral hi mipuiin an ngaithiam lova, engvangin nge hetiang zat hi a ‘lapse’ theih tih te chu chhuichian tul a tih thu a sawi a ni.

Lalrinmawia Ralte chuan hetianga sum ‘lapse’ a awmna chhan hi full budget pharh tlai vang a nih theih thu sawiin, department thenkhat pawisa a ‘lapse’ tam bik chhan chu hriatchian pawimawh a tih thu a sawi bawk.

Hetih lai hian tunhma pawhin sorkar pawisa hi a lo ‘lapse’ tawh thin tih Lalrinmawia Ralte chuan sawiin, kum 2007-2008 khan Rs. vbc 79 (9%) a lapse a, kum 2008-2009-ah pawh Rs. vbc 223 (21%) a lapse tawh tih a tarlang bawk a ni.

Eptu member Lalduhoma chuan, plan final tlai avanga he thil hi thleng anga sawi chu chhuanlam tlinga a ngaih loh thu sawiin, Finance Minister leh Minister dangte chu mahni department sum dinhmun hrechiang tawk lo an nih avangin bang ngam se a duh thu a sawi chhuak a ni.

Lalduhoma chuan State Bank of India General Manager, North East Circle chuan, March ni 31 zan dar 6:30-ah Bank te chu khar an nih tur thu March ni 15 khan thuchhuah a siam tih sawiin, ‘March ni 30-ah he hriattirna hi department hrang hrangah sem darh (circulate) chauh a ni,’ a ti.

Treasury te chu March ni 18 thleng khan ni khatah Rs. nuai 50 chiah sanction phalna pek an ni a, ni 18 hnu lamah Rs. vbc 5 sanction phalna pek leh niin, March ni 31 phei kha chuan limit awm lovin sanction an phal sak a, ‘hei hian sum hman dan a tibuai a ni,’ Lalduhoma chuan a ti bawk.

Dr.R.Lalthangliana chuan, hetiang zat sorkar pawisa hman loha liam chungchangah hian a mawhphurtu ber chu Finance Minister a nih thu sawiin, ‘sum bawm hotupa berin a monitor tha lova, chuvangin a ban ngam a ngai a ni,’ tiin ‘midang a ruat mai ngam a ngai a ni,’ a ti bawk.

--------------------

DEPARTMENT HRANG HRANG SUM ‘LAPSE’ ZAT

AIZAWL NORTHTREASURY

Rural Development department : Rs. 21,50,06,988/-
Social Welfare department : Rs. 9,93,67,466/-
Tourism department : Rs. 2,92,000/-
School Education department : Rs. 19,12,000/-
SCERT department : Rs. 71,42,400/-
Health Services department : Rs. 7,21,71,302/-
Hospital & Medical Education department : Rs. 2,41,07,259/-
TOTAL : Rs. 41,99,99,415/-

AIZAWL SOUTH TREASURY

Law & Judicial department : Rs. 19,64,750/-
Urban Development & Poverty Allevation deptt. : Rs. 8,89,58,364/-
Industries department : Rs. 1,04,01,255/-
Science & technology department : Rs. 3,39,000/-
Planning department : Rs. 1,06,14,623/-
Transport department : Rs. 58,14,104/-
General Administration Department (Aviation) : Rs. 39,94,188/-
Protocol department : Rs. 19,99,400/-
Secretariat Administration Department : Rs. 22,969/-
Trade & Commerce department : Rs. 1,20,00,000/-
AH & Vety department : Rs. 2,16,89,713/-
Police department : Rs. 11,00,46,770/-
Food Civil Supplies & Consumer Affairs Deptt. : Rs. 16,90,613/-
Rural Development (Secretariat) : Rs. 26,305/-
TOTAL : Rs. 26,95,62,054/-

GRAND TOTAL : Rs. 68,95,61,469/-

--------------

SUM A ‘LAPSE’ TAM CHHAN

— Govt. Sanction Order (Director power in a phak loh chin) ti turin kawng a thui lutuk. Dawhkan 94 vel a kaltlang a ngai.

— Planning Commission-in Plan Discussion a koh hun a fuh lo. Officer tam tak an zin bo.

— Budget session leh Fianancial year tawp a inrual, santion file a kalchak thei lo.

— Revised Estimate kum danga January/ February kar khatna a chhuak thin chu March kar
hnihna-ah a chhuak chauh.

— March ni 30 leh 31 khan khaw chhiat avangin power supply a mumal lova, sanction a chhuah tlai phah nasa.

— Finance department-in Treasury-ah a bill pass theih zat (daily ceiling) a ti sang har. Treasury-ah bill tam tak a inhnawh-khawm.

— SBI te hi core banking a nih tawh avangin ram pumah bank an khar tawh chuan tihluih theih a ni lo. Kuminah khan kum dang aiin Bank an khar hma.

— Department ten sanction proposal an siam tlai lutuk.

SAWIHONA ATANGA RAWTNA

— SBI chauh ni lo, Nationalised Bank dang, Punjab National Bank, United Bank of India etc. te hman tangkai an hun.

— Secretary te hnenah financial power pek a tul tawh. Financial power decentralisation pawh kalpui a ngai tawh bawk.

— Sorkar sum a lapse ai chuan AC bill emaw, civil deposit emaw in hren theih a ni.

— Finanacial transaction system thlak a tul, sum draw chhuak turin a kal chhung a rei lutuk.

— Sorkar hnathawkte khauh zawka enkawl an ngai.

— Finanace Minister hran neih a pawimawh.

— Planning Department-ah Estimate endiktu mithiam dah belh an ngai.

Thulakna : The Zozam Times