Silchar-ah Mizo hmeichhe pakhat pawngsual rawn

December ni 2 zan khan Mizo hmeichhe pakhat, Champhai district-a mi chu Silchar-a zirlai rualin an pawngsual a. He Mizo nula hi Silchar Mizoram House hnathawktute chuan Inrinni khan Mizoramah an rawn thawn chho a, hetih lai hian he nu vek hi vawiin tlai khan Lala Police Station, Silchar te chuan an man leh.

Silchar Mizoram House Liaison Officer, James Lalrinchhana hnen atanga thu dawn danin, he Mizo hmeichhia hi November ni 27 khan Silchar-ah a thiannu nen an chhuk a. Bazar-ah a thiannu nen an inhloh avangin Mizo hmeichhe pakhat, Malsawmtluangi (Ms-i) a bel a. Ms-i hnen -ah hian hawna tur sum dilin, a ni chuan pawisa a neih loh thu leh inzuar mai \haa a hriat thu a hrilh a ni.

Ms-i sawi ang hian December ni 2 zan khan zirlai pahnih In luahah kalin an indawr a, mahse an in dawr ang nilovin an pawngsual rawn ta a ni. An sual rawn hnu hian he hmeichhia hi tlanchhuakin, amah pawngsualtute mobile phone a laksak a. Hemi hnu hian Ms-i In hi a pan ta a ni.

A tukah heng zirlai rualte hian he hmeichhia hi rawn zawng lehin khawlaiah an intibuai a. Mizo hmeichhe pahnih hian mobile phone chu pe leh tura insawiin Mizoram House-ah an tlanchhe lut a. Anmahni umtu hnamdang pahnih pawh House-ah hian an lut ve bawk a. Silchar LO leh staff ten thu an zawhfiah hnu-ah police hriattir niin, hnamdang 2 chu man ngal an ni a, Ms-i pawh mi inzawrhtir-ah puhin thubuai siamsak a ni bawk. 

Hemi hnu hian Police te chuan pawngsualtu nia puh mi 7 an man a, pathum te chu an la zawng mek. Heng pawngsualtu nia puh te hi zirlai rual an ni a, thenkhat chu college kal tawh te an ni a. An thiante pahnih In luah-ah an pawngsual rawn a ni.

Pawngsual tawktu Mizo hmeichhia hi Silchar LO leh staff te chuan tuamhlawmin, Mizorama a hawna tur sum pawh an ngaihtuah sak a. Court-a inlan a mamawh hunah pawh Silchar Mizoram House chu pan thin turin an hriattir a. Inrinni khan Mizorama haw turin an thlahliam a ni.

Hetih lai hian vawiin, Pathianni tlai khan Lala Police Station chuan Mizo hmeichhe pahnih an man thu Silchar LO hi an hriattir a. Silchar LO in a ngaihven chuan, pawngsual tawk nia sawi leh a thiannu Ms-i te bawk chu an lo ni leh nia thu dawn a ni.

Pawngsual tawk nia sawi Mizo hmeichhia hi thil awmdan an han zawh chian chuan, ruihhlo (No-4) pawh zuar thin, a awmna veng pawhin an lo hnawhchhuah tawh niin an sawi.

Silchar Mizoram House LO chuan, nikum december atanga vawiin thleng khan, hetianga buaipui ngai hi mi 70 vel an buaipui tawh thu sawiin, hnam ang pawha a mualpho theih avangin fimkhur a tul thu a sawi.

Thulakna: The Zozam Times