Science zirtirtu ngiatin exam thulh tum

12/04/2010 16:27

Phuldungsei Govt. High School-a zirlai nu leh pate leh, MZP Phuldungsei Branch-te chuan an High School-ah hun rei tak chhung science zirtirtu an neih loh avangin April 14, Nilaini atanga first term exam tan tur chu dan (boycott) an tum.

MZP Phuldungsei Branch President, C Lalruatdika'n Vanglaini a hrilh danin, Inrinni khan zirlai nu leh pate leh MZP-te an thukhawm a, August 2009 thlaa sorkarin science zirtirtu a pek, thla hnih âwrh a thawh hnua a sawnsak leh chu an ngai thiam lo hle a ni. Hei hi sorkarin an khaw zirna a ngaihthahzia leh a ngaihsak lohzia a tilang nia an ngaih thu sawiin, science zirtirtu an neih loh avang hian kum kal taa an sikul result pawhin a chiat phah hle niin an sawi.

Science zirtirtu an neih loh vanga an harsatna hi sorkarah an lo thlen tawh thin a, mahse tun thlengin science zirtirtu chu pek an la nih loh avangin first term exam tur chu boycott an tum ta a ni.

Hei bakah hian, High School zirlaite pawhin science zirtirtu an neih hma chu sikul kai an tum tawh lo bawk.

Thulakna: Vanglaini

Back