Sawrkar leh Kohhran Tih Tur Chin

- D.R.Zirliana

Mizoram-ah hian Mizote hian kristian vek an nih avangin kristianna leh ram rorelna (politics) chu a kalkawp tur a ni an ti niberin a lang a. Awm pawh a awm viau reng a ni. He thlirna atang hian chuan Mizoram sawrkar leh kohhrante chu an kaldun ang a, kohhran thu thuin sawrkar a kal tur a ni a, a lehlamah sawrkar thu thuin kohhran a kal tur a ni a tih theih bawk ang. Tin, kohhran leh sawrkar chu inremtakin an kal tur a ni tihna a ni bawk ang.

Ram rorelna (sawrkar) leh sakhua (kohhran) a kal dun hi a that hmel hle a. Mahse, han chhut chian chuan sakhua leh sawrkar chu a hrang a ni a. Sawrkarah sakhua (kohhran/kristianna) chu lakluh loh tur a ni lo a, kohhranah sawrkar chu lakluh tur a ni lo a ni. Zau zawkin ha ngaihtuah ta ila. India sawrkarah hian Hindu rin dan leh duh dan lakluh ni ta se, Kristiante chu a auring ring an ni mai thei. Kristian duh dan leh rin danin sawrkar kal ta se, Hindu-te chuan an helh hle ang.

Chuvang chuan India ram chu sakhaw awm lohna (secular state) a ni a. Sawrkar chuan sakhua a nei lo a, sakhua chuan ram rorelnaah sawi tur a nei lo a ni. Sawrkar thil tihah emaw sawrkarah emaw sakhuana lakluh a nih chuan a zavaiin lakluh tur a ni a. Sawrkar thil tihah sakhaw thil lakluh a nih chuan Hindu, Islam, Kristian, Sikh,etc. tih dan chu a lo berah pawh lakluh a ni thin a ni.

Amaherawhchu, sakhua hi a enga mah hian thil tha lo zirtir a nei lo a, sakhua engpawh hian thil tha a zirtirin a duh a. Mi zawng zawng zingah hian sakhaw nei lo tawp chu an awmawm love. Chuvangin sawrkar enkawltute chu sakhaw mitak niin, chu a sakhua zirtirna leh duh dan anga nungin ram rorelna an kalpui erawh chu a pawimawh khawp si a ni. Sakhua chuan tumah huat a nei lo a, sakhawtin hian hmangaihna te, ngilneihna te, tlawmna te, tharum thawh loh te, remna te, muanna te, rinawmna te, taimakna te, thil tha zawng zawng hi a zirtir vek a ni. Chutiang nunpuitute chuan sawrkar an enkawl a, an kalpui erawh chu a pawimawh hle a ni. Sakhaw tihdan kha sawrkara va lakluh tur tihna ni lovin.

Chutichuan kristian sawrkar pawh hi din theih a ni a. Piangthar, Pathian thu awi, Pathian tihtakin sawrkar chu kalpui theih a ni a. A hmingin kristian sawrkar ni kher lo mah se kristiantakin sawrkar hi a kalpui theih a ni.

Synod Executive Committee inkhawm mek chuan eirawngbawlna gas leh buhfaitham hralha tehna chungchang, Presbytery pakhat atanga thulut an ngaihtuah a.Gas hi sawrkar chuan chhungkaw eirawngbawlna (domestic) atana hman chi leh chhungkaw eirawngbawlna ni si lo (non domestic)-ah a  then a. Kohhranten gas an hmang a nih chuan non domestic gas an hmang tur a ni a ti a. Kohhran chu domestic-ah telh ni rawh se, tiin Presbytery pakhat atangin thu a lut a ni.

Sawrkar chuan thil zawrh chu buhna leh tehna diktaka teh ni rawh se a ti a. Buhfaitham hralhchhuaha tehna chu no emawa suak/teh lovin, a buka buk ni rawh se a ti a. Presbytery pakhat atang chuan hetah hian buhfaitham chu telh ve loh ni rawh se, ti lamin thu a lut a ni. SEC chuan heng thil pahnihah hian sawrkar thu chu zawm ni se an ti a ni.

He thutlukna hi a fingin a zahawmin a dik hle. Kohhran chu chhungkua (domestic) chu an ni lo chiang a ni. Buhfaitham pawh chu hralh a nih chuan buk ve mai tur a ni. Kohhran (kristian) nih avanga dan zuk pawhfan emaw, kalphung zuk thlahdul bikna tur a awm theiin a lang lo a ni.

Hetiang hi kohhran kal dan tur chu niawmtak a ni. Zu chungchangah pawh hian kohhran chuan eng sakhua mahin, zu in tur te, siam tur te, zuar tur te, rui turtein tumah a duhin a fuih lo. Mahse, sawrkarin zu chu khap tul a tih chuan a khap mai tur a ni a, khap bawk, thlah zalen bawk a tul a tih chuan sawrkar thuneihna a ni. Kohhran (sakhua) tih tur chin chu zu that lohzia zirtir a ni a. Zu laka inthiarfihlim tura zirtir a ni. Tunah chuan Mizoram sawrkar chuan zu chu khap tha a ti a, a khap mai a ni. Sakhua emaw, kohhran emaw lo inrawlhna tur niin a lang lo a ni. Zawlaidi chungchangah pawh.

Thulakna: Mizo Aw