Rungi Nu leh Thialtea

Rungi nu leh Thialtea hi an awm a, vawi khat chu Thialte chuan, “Rungi nu, ka thei hual i lo dun ang hmiang,” a ti a. Rungi nu chuan, “Kei zawng ka lawn ve thei si lo va, a hmin tha min thlak ve duh lo vang,” a ti a. Thialtea chuan, “Thlak duh e a, a hmin tha tha ka thla ang che,” a ti a. Rungi nu chuan, “A hmin tha min thlak ve dawn chuan ka duh e,” a ti a. Chuti chuan Thialtea thei hual lo tur chuan an kal ta a.

Thei awmna hmun chu an thleng a, thei chu a lo rah hmin tuar a, Thialtea chuan, “Rungi nu, a bulah khan lo awm rawh le, ka han lo ang e,” a ti a, Rungi nu chuan, “Aw le,” a ti a, Thialtea chu a han lawn a, thei hmin tha chu a han lo ta a. A hmin tha tha chu a ei thuai thuai a, a eina pil hawng chauh chu a thlak ta mai a. Rungi nu chuan, “Thialte, a hmin tha kha min han thlak ve rawh khai, i eina pil chauh min thlak a, ei tur a awm lo ve,” a ti a. Nimahsela, Thialtea chuan a thlak duh chuang lo va. Rungi nu chu lungchhe takin a tap ta hliam hliam a. Chutih lai chuan Sazuk hi a lo kal a, “Rungi nu, engah nge i tah kerh kerh?,” a ti a. Rungi nu chuan, “Thialtea’n thei lawhpuiah min sawm a, ‘A hmin tha ka thlak ang che ’ a ti a, min thlak leh duh si lo va, ka tap a ni,” a ti a. Sazuk chuan, “Hau rawh ka chhan ang che,” a ti a. Rungi nu chuan a hau ta a,

“Thiala, thiala, thialtea,

I vun te kha rai hir hiar,

Sahdalah tla ri pem tla ri pem,

Zawnga kal theu theu,” a han ti a. Chu veleh Thialtea chu thinrim em em in a lo chhuk thuai thuai a, Rungi nu chu a vel ta nek a, sazuk lah khan a chhan leh ngam si lova, Rungi nu chu a tap leh ta kerh kerh a.

Nakinah chuan Savawm hi a lo kal a, “Rungi nu engah nge i tah kerh kerh? ” a rawn ti ve leh a. Rungi nu chuan, “Thialte’n thei lawhpuiah min sawm a, ’A hmin that ha ka thlak ang che ’ a ti a, min thlak leh duh si lo va, ka tap a ni,” a ti a. Savawm chuan, “Hau rawh ka chhan ang che,” a ti ve leh a. Rungi nu chuan, “Min chhan leh ngam lo vang, ka hau ngam lo,” a ti a. Savawm chuan, “Ka chhan ngei ngei ang che,” a ti a. Rungi nu chuan a hau leh ta a:-

 “Thiala, thiala, thialtea,

I vun te kha rai hir hiar,

Sahdalah tla ri pem tla ri pem,

Zawnga kal theu theu,” a han ti leh a. Chu veleh Thialtea chu thinrim em em hian a rawn chhuk thla a, savawm chuan Rungi nu chu a chhan leh ngam si lo va. A rawn vel leh ta hrep mai a. Rungi nu chu a tap leh ta kerh kerh a. Ramsa chi rin reng hi an lo kal a, “Hau rawh ka chhan ang che,” an rawn ti theuh va, tuma’n an chhan leh ngam chuang lo va.

Nakinah chuan sakei hi a lo kal vel leh a, Rungi nu tap kerh kerh chu a han hmuh chuan, “Rungi nu, engah nge i tah keuh keuh?,” a rawn ti ve leh a. Rungi nu chuan, “Thialtea’n thei lawhpuiah min awm a, ‘A hmin tha tha ka thlak ang che ’ a ti a, min thlak leh duh si lo va, ka lung a chhe em a, ka tap a ni,” a ti a. Sakei chuan, “Hau rawh, ka chhan ang che,” a ti leh a. Rungi nu chuan, “Ka hau ngam tawh lo, sazuk te, savawm te leh ramsa chi dang dang an lo kal a, ‘Hau rawh ka chhan ang che,’ an ti a, ka hau va, min chhan leh ngai si lova, Thialtea’n min vel hrep zel a,” a ti a. Sakei chuan, “Ka chhan ngei ngei ang che,” a ti a. Rungi nu chuan a hau leh ta a:-

“Thiala, thiala, thialtea,

I vun te kha rai hir hiar,

Sahdalah tla ri pem tla ri pem,

Zawnga kal theu theu,” a han ti leh ta a. Thialtea chu Rungi nu velh tum chuan thinrim em emin a lo chhuk thla leh ta thuai thuai a, Rungi nu chu velh a tum a, chu veleh sakei chuan a lo seh a, a seh hlum ta daih a. Rungi nu chu lungawi tain a haw ve leh ta a.

Thulakna: Mizo Thawnthu Vol II by Lalhmachhuana Zofa