Ruahpui karah Mizo film 'Khawnglung Run' shooting kalpui zel

Mizo film siam tawha la hautak ber tura ngaih 'Khawnglung Run' chu Leitlang Pictures hmalaknain may 21 atang khan shoot tan a ni a. An riahna hmun hi thli leh ruah natna hmun; Darkhuang tlang chhip a ni a,

Lunglei atanga 5kms a hla Kawmzawl hmuna awm a ni. Helai hmunah hian hmanlai mizo khua angin In an sa chawp tawp mai a ni.

He khuaah hian in sawmthum vel sak (chawp) a ni a In sak te hi khua an run leh hunah halral leh vek tura tih a ni. Tuntuma a changtu te hi Lunglei  chauh ni tawh lovin Aizawl, Serchhip leh hmun dang atangin an awm nual bawk. Aizawl leh hmun danga mite hi NSD lama training chhuakte an  ni. He film ah hian zaithiam lar tak tak te pawh an chang nual a. He film hi 1854 bawr vel a Pawi Ral-in Khawnglung khua an run chanchin behchhana siam a ni a hetah hian nula leh tlangval inngaizawng Chala leh Thangi chanchin zeh tel a ni bawk..  

He film hi mizo film awm tawhah chuan technically a la advance ber tura ngaih a ni a, high definition 24p format a shoot a ni a, nakina celluloid a leh duh hunah pawh celluloid film format mila shoot a ni.

He Project a sum insenso zat tur ruahman chu cheng nuai sarih vel a ni bawk. Khawchhia leh thlipui karah pawh shooting hi Director Mapuia kaihhruaina hnuaiah ngawrh taka kalpui mek a ni a, shooting set atana khua an sakna hmun thleng hian motor a luh theih loh avangin hnathawh leh bungraw thiar vel a hautak hle a ni. Mi 22 riaklut nghalin, tunah phei chuan mi 50 vel lai an riah luh tawh avangin ei leh in pawh a hautak hle. Chubakah he tlangah hian tui a awmloh avangin PHE Department in tui supply dan a ngaihtuah sak a, chubakah Lunglei DC in shooting camp a hman atan silpaulin engemawzat bakah DCSO atangin an mamawh hrang hrang pek an ni a.

Mizo hnamzia pholanna film anih avangin Art & Culture department atang pawhin hmanraw engemawzat hawh a ni a. Hei bakah hian mimal tlawmngai tamtak hnen atangin hmanlai silai, sa lu leh bungrua dang hawh a ni bawk. June thla chhunga shoot zawh hman beisei  a ni bawk.

Thulakna: Ralvengtu