Re-evaluation-a MZU dan sawisel

Students Self-Support Union (SSU) chuan, tun hnaia Mizoram University-in degree course hrang hrang final exam result a tihchhuahah, subject thenkhatah mark hmu sang berte rank nei lo leh Gold Medalist-a dah loh an awm thu an sawi a, hetianga dah an nih theih loh chhan dan chu tha lo an tih thu an tarlang.

SSU thuchhuah tarlan danin, hetianga mark hmu sang berte rank emaw nei loa dah an nih chhan hi - MZU Academic Council Resolution No. AC:13:4 (12)/O, Dt. 11th December 2008-in re-evaluation tite'n hamthatna hrang hrang - gold medal, scholarship, fellowship, admission, promotion leh thil dangte an dawng thei lo ang, tia a rel vang a ni a. He dan hnuaiah hian mahni mark hmuh zata lungawi lo zirlaiin a a complain a, a lo hlawhtlingin, mark hmu sang ber mah se, hamthatna dang tam tak a dawng thei dawn lo a ni.

SSU chuan, MZU-in re-avaluation a phal a, re-evaluation mark an pawmsak si chuan an mark tharin result-ah awmzia nei ngei se an duh thu an sawi a; "He dan hi dikna rahbehnaah kan ngai. He dan hi siamtha ngei tur leh, kum 2010 result pawh hi siamtha ngei turin MZU hotute kan ngen a ni," an ti.

SSU tarlan danin, nikum khan re-evaluation ti zinga 70% vel an hlawhtling a, an mark pawh tihdanglam a ni. Kuminah pawh hian zirlai tam takin complain an thehlut leh bawk. Hetih lai hian, Academic Council dan siam avanga rank neih loh hlau zirlai eng emaw zatin an complain ngam lo niin SSU chuan an tarlang a; hengte hian examiner-te fimkhur lohzia leh an endik uluk lohzia a tilang chiang hlea an hriat thu leh, Commerce-ah phei chuan result siamthat vek ngai khawpin tihsual a awm thu an sawi bawk.

Thulakna: Vanglaini