Ramri-ah boruak a ralmuang

14/06/2010 02:00

Mizoram leh Assam inrina bawr vela boruak duhawm lo thleng mai thei tura Lailapur NGO leh All party ten thawm an neih chuan, nimin thleng khan boruak danglam a siam hriat a ni lova, Assam sorkar hnena an lehkha thehluh avangin kawng dan pin an tum niawm a sawi pawh thu thang dik tawk lo a nih thu dawn a ni.

Tarlan tawh angin June ni 7, 2010 khan Assam a NGO leh political party hrang hrang Lailapur-a Joint meeting chuan June ni 8, 2010 khan Mizoram leh Assam inrina chungchanga an ngaimawh thil pali Assam sorkarah an thlen a. Heng an ngennate hi darkar bi tiam an siam chhunga sorkar-in a ti hlawhtling lo anih chuan road block siam an tum nia sawi a ni a, hei hi thuthang dik lo nia thu dawn a ni. Hetih lai hian NGO leh All party te hian ramri leh a kaihhnawih thilah memorundum dang, Assam sorkarah thehluh leh an tum mek nia thudawn a ni thung.

Hetih lai hian Mizoram PWD ten Lailapur thlenga kawng chhe lai siam that hna an thawh chu zawh fel tawh a ni a. Vairengte dai, MZP ten Zorun an sakna bula BRTF awmte chhuahsan hmunah, Assam police te awmtir turin NGO leh All party te hian an sorkar an ngen mek a. Helai hmun hi Mizoram chhung a nih avangin Mizoram tan Assam police te an awm anih chuan harsatna lian zawk a chhuah theih a hlauhawm tih thudawnna chuan a sawi.

Thulakna: The Zozam Times