10/03/2010 12:58
Tunlaia Burma atanga bungraw phurhluh awm lo tih chungchang leh tuna sumdawnna kalpui mekah Trade & Commerce department chuan engmah a hriatpui ve lo a. Tunhma atang tawha helaia Burma bungraw laluta sumdawnna chu India leh Myanmar sorkar ten Zokhawthar-a insumdawn tawnna tura inremna an ziah nen inzawmna a nei lo tih thudawnna chuan a sawi.
Zokhawthar-a Bur-ma bungrua sumdawn nana phurhluh chung-changah hian tunlaiin a phurtu truck te Assam Rifles lamin an lo enfiah zel thin avangin bungraw phurtute hi an tlan duh rih lo a, karkhat chuang zet chu bungrua a lut tawh lo niin hriat a ni a. Hetih lai hian ram pahnihte insumdawn tawnna tur Land Custom Station ber official-a hawn a la nih loh avangin helai hmuna sumdawnna chung-changah hian tih theih an nei rih lo tih thudawnna chuan a sawi bawk.
Zokhawthar leh Melbuk-a India leh Myanmar insumdawntawnna tur kalpui mek chu hawn theiha peih a ni tawh a. Nikum December thlaa hawn tura lo ruahman tawh chu khatih lai khan Weight Bridge la bun zawh loh a nih avangin central lam atangin an thulh leh a ni.
Tunah hian Zo-khawthar-a insumdawn tawnna tura pawimawh ber Land Custom Station chu peihfel a ni tawh a, Myanmar lam erawh chu an la inpeih fumfe lova hriat a ni. Myanmar lamah hian Rih leh Tiddim inkar kawng siam hna chu India sorkarin a pui mek a. Zokhawthar-a Land Custom Station-ah hian Custom, Postal, Police, Agriculture leh a dangte awmin, quaters engemawzat sak zawh a ni tawh a, sum awmdan azirin sak belh chhoh mek zel a ni bawk. Zokhawtlar-a Land Custom Station sakna senso hi central sorkar atangin cheng nuai 422.08 hmuh a ni a, Assistance to States Infrastructure Development Scheme (ASIDE) atangin engemawzat hmuh a ni tawh bawk.
Insumdawn tawnna atan hian India sorkar chuan item chi hrang hrang 40 lakluh leh thawnchhuah theih turin a pawmpui tawh a ni. Land Custom Station, Zokhawthar hi nikum November thla khan central atangin Inspection Team te chuan an rawn tlawh a, an thil hmuh dante report an peknaah chuan he insumdawn tawnna tura thil pawimawh building leh thildanga hmalakna chu tha an tih thu an tarlang a ni.
Thulakna: The Zozam Times