R. LALZIRLIANA LEH TLAWMNGAI PAWL TEN PAWISA KHAWN (DONATION) CHUNGCHANG SAWI HO

Vawiin chawhnu dar 1pm khan Secretariat Conference Hall-ah Home Minister R.Lalzirliana’n tunlai Mizorama Tlawmngai Pawl zinga hnamdang hnen  atanga pawisa khawn thin tam lutuk chungchangah Tlawmngai pawl hrang hrang hruaitu kalkhawmte nen sawi hona an nei.

Home Minister R.Lalzirliana chuan he inkawmhona-ah hian thusawiin, tunlaiah hnathawk peih lo awm mai mai, eng Tlawmngai Pawl emawh invuah chawpa pawisa khawn Mizoram chhunga tam ta lutuk hian, state ralmuang ber leh Kristian za-a za inti thin hnam hi min ti mualpho a, kan hmai an ti mawk a, hnamdang te tan Mizoram chu  ralmuan lohna hmunah an chan tir a ni, a ti.  Minister chuan ram tina kal a chanchin tha hril tur kan nih laiin, kan bula min chenchilhtu ringlo mi te’n mizo chu hnam sual tak, hah taka mi thawhchhuahsa chhuhsaka mi chunga hleilen thin anga min hmu chuan kan kristiana nen phei chuan a in hmeh lo hle dawn a ni, a ti bawk.

Home Minister chuan vawiina kal khawm Tlawmngai Pawl hrang hrang hruaitute hian sorkar rilru in hria a, sorkar chuan donation hming put tira pawisa khawn hi kan duhlo a, dan in a phal bawk lo a ni. Dan in a phal loh a ni tih hre reng chunga dan kalha tilui an awm chuan dan in milian leh mite thliar hrang lovin  ro a rel tur thu a sawi.

He inkawmhona-ah hian sorkar lam atangin Home Minister,Parliamentary Secretary (Home) Pu Lalrinmawia Ralte,  Home Commissioner Pu Lalmalsawma bakah sorkar mi pawimawh tha hnem tak an tel a Tlawmngai Pawl CYMA, MHIP, MUP,  MZP leh MEWA  aiawh  te bakah MJA te an tel.

Thulakna: The Zozam Times