Pune Mizote'n Ngen

01/09/2010 14:06

Pune Mizo Welfare Association (PMWA) chuan thuchhuah siamin, Pune khawpuia Mizo awmte chu PMWA-a inziak lut tur leh, awm dan fimkhur turin an chah.

Pune Mizo hruaitute chuan an khawpui chhunga Mizote chu chhiatni thatnia an inhriat pawh theih nan leh, Mizo hnam a mualpho lohna tura tha taka inthlun khawm vek an duh a, zirlai kal tharte chu PMWA-a inziak lut vek turin an ngen a; Mizoram lama nu leh pate pawh an fate chu Mizo inhlawmkhawmna pawl bêl tura hrilh turin an chah.

PMWA chuan Mizo zirlai leh hnathawkte chu Pune-a an awm chhungin Mizo inkhawmna ngai pawimawh turin an ngen a - Pune Mizo Christian Fellowship, Hindustani Covenant Church, Solapur Road-ah Pathianni chawhnu dar 1:30-4:00 apianga an inkhawm thin thu leh, Spicer College hnai vaia awmte tan Spicer College, Aundh Road-ah Inrinni apiangin Mizo inkhawm tlai dar 4-6-ah a awm thu an chhuah a, zirlai nu leh pate chu an fate hnena heng inkhawmna hun leh hmunte hriattir turin an ngen bawk.

PMWA hruaitu A.Chhawnmawia, chairman (Phone:09689771889) leh Vanlalkima Colney, Secretary (Phone: 09689771889) hnenah harsatna leh zawh fiah duh neite tan biak pawh theih a ni

Thulakna: Vanglaini

Back