Pu Vawma Tui Khuap

Hman lai hian Pu Vawma hian tui a khuap a, a khuap li hluau mai a. A tuikhuah tlin sa chu tuma in ve a phal lo va, a veng tlat thin a. A ven hman loh changin Zawngte hi a ventir thin a. Ni khat chu Sanghal hi a lo kal a, tui chu rawn in a tum ta mai a.

“Tui tui ka chhar ka chhar,

Tu tui duh loh te te maw ka chhar ka chhar;

Keiman dawt na riai riai ”- a han ti a.

Chu veleh Zawngte chuan,

“Ka Pu Vawm vawma tui a ni,

I dawt ngam leh dawt rawh,

I in ngam leh in rawh,”- a lo ti zat zat a.

Sanghal chuan a in ngam ta lo va, a kalsan leh ta mai a. Nakinah chuan Zukchal hi a lo kal ve leh a, a ki te chu a mawiin a ropui hle a. Pu Vawma tuikhuah chu a rawn hmu ve leh a, a in chak ve leh ta em em mai a. Sanghal tih ang bawk khan,

“Tui tui ka chhar ka chhar,

Tu tui duh loh te te maw ka chhar ka chhar;

Keiman dawt na riai riai,” a han ti vel leh a. Chu veleh Zawngte chuan rang mangkhengin –

“Ka Pu Vawm vawma tui a ni,

I dawt ngam leh dawt rawh,

I in ngam leh in rawh,”- a lo ti leh zat zat a. Zukchal chuan a in leh ngam ta lo va, hmanhmawh takin a kalsan leh ta a. Nakinah chuan Keipui lian pui hi a lo kal ta chhur chhur mai a, Pu Vawma tuikhuah tling fim kuk mai chu a rawn hmu ve ta a, a tui a hal nasa tawh si a, a in chak ta hle a,

“Tui tui ka chhar ka chhar,

Tu tui duh loh te te maw ka chhar ka chhar;

Keiman dawt na riai riai,” – a han ti vel leh a. Chu veleh Zawngte chuan thing ler atangin –

“Ka Pu Vawm vawma tui a ni,

I dawt ngam leh dawt rawh,

I in ngam leh in rawh,”- a lo ti a, Keipui chu a hawi vual vual a, Pu Vawma tui khuah tlin sa chu a dawt ta hruam hruam mai a. Zawngte chuan mangang takin, “Ka Pu Vawm, ka Pu Vawm lo tlan rawh, lo tlan rawh. Pu Keia’n i tui a dawt zo dawn e,” tiin Pu Vawma chu a au ta chul a. Chu veleh Pu Vawma chu hmanhmawh bak lengin a lo tlan a, Pu Keia nen chuan an insual ta buan buan mai a.

Zawngte chuan hlauthawng takin thingler atangin a lo thlir a, tan zawk tur pawh a hre thiam thei lo va, a inhneh tawk hle si a.....”Ka Pu Vawma aw tang tang, ka Pu Keia aw tang tang,” a lo ti thin a. Sakei leh Savawm insual chu an inhneh tawk si a, chak zawk pawh an awm thei lo va. An insual nasa lutuk chuan khua an hmu lo va, lengkirah an tla dun ta a, an insawh hlum ta der a.

Nakinah chuan Zawngte chu thingler atangin a lo chhuk a, ngam leh ngam lovin Pu Vawma leh Pu Keia tlakna hmunah chuan a kal a, a rin loh deuhvin an lo thi ve ve a. Pu Vawma leh Pu Keia thi chu a lawm khawp a, an tuhte chu a khawng vel a, “Ka Pu Vawma ruh aw ring ring, ka Pu Keia ruh aw ring ring,” a ti a. An ruh ring tha tha chu a la khawm a, phenglawngah a siam a, a tum ta hlerh hlerh a.

Thulakna: Mizo Thawnthu Vol II by Lalhmachhuana Zofa