PU N.K. CHAKMA’N WRESTLING CHAMPIONSHIP HAWNG

01/12/2010 22:39

Vawiin khan Pu Nihar Kanti Chakma, Minister, A.H. & Veterinary Department chuan Zarkawt Recreation Centre ah 1st North East Senior Wrestling Championship 2010 chu a hawng a. He Championship hi Mizoram Wrestling Association (MWA) ten buatsaihin, North Eastern Council (NEC) chuan an sponsor a ni.

Pu Nihar Kanti Chakma chuan he championship in a tum ber chu Wrestling tih lar piah lamah Hmarchak a state hrang hrang te inunauna leh inkungkaihna tih hmasawnna nan a ni tiin Wrestling chu sports hautak vak a nih loh avangte in, thalai tam zawk in an tuipui theih a beisei thu a sawi. Inel chhung hian infiam mite chu sportsmanship spirit engtik lai pawhin a taka lanchhuah tir turin a chah bawk a ni.

He Championship hi December ni 3 thleng awh tur a ni a. Championship ah hian Wrestling Style chi hnih – Free Style leh Greco-Roman Style ah te inelna neiin, weight category hrang hrang pasarih a then a ni. He Championship ah hian Hmarchak state hrang hrang – Mizoram, Tripura, Nagaland, Manipur leh Assam atangin infiammi 108 an tel a ni.

Thulakna: DIPR

Back