Politics Ka Khel Dawn

-Lalthuamliana

Anti/Pro Sal Tang

Kum 1992-ah a hunlaia UN Secretary Genenral Boutros Boutros Ghali-an a thusawinaa "Globalization " tih a hman tan atang khan he tawgkam hi chanchinbu tawngkam lar tak a lo ni chho tan ta a. Chuti anga globalization chungchang ziaktu an lo tam takah chuan ngaih dan leh ziah dan a lo hrang ta hle a. Inkalh tak takte pawh an ni nawk mai. Chung ngaih dan chi hrang tam takte chu Anti(dodaltu pawl ) leh Pro(thlawptu pawl ) tia a tlangpui thua thenin an lo awm a. Pro pawlte chuan globalization chu a eng zawng leh a tha zawng hlirin an thlir a, Anti pawl erawh chuan globalization nghawng tha lo lam sawi uarin an sel vek mai a ni.

A bikin ram hausa leh thiltithei deuhten globalization hmel an hmu mawi a, ram rethei leh chenbehte chuan phung hmuhin an hmu thung. Ram hnufuala chengte leh hnam tenau deuhten globalization nghawng chhiat theihzia sawiin ram leh hnam inchimralna hmanruaah an ngai a, ram leh hnam humhalhna thu an tlangaupui nasa a ni. Chuti anga a lehlam lehlamin globalization dawnsawndan kawng thar tha zawk ngaihtuah tum lova mahni ngaih danah an din ngheh bur avangin dotu leh thlawptu(Anti/ Pro ) salah an lo tang tawh thin a ni.

Hei hi globalization chungchangah chauh ni lovin tunlai kohhran leh khawtlang kan thanmawhbawk, kan saltanna a ni ve tho mai. Kohhran kalphung leh khawtlang inkaihhruai danahte mahni duh dan leh ngaih dan hawlh lawr a, min tawmpui lotu chu Anti hming vuaha min thlawptute nena theihtawp chhuah a, chu Anti pawl(ni-a kan hriat ) sawisela inchirhtheh hi kan ngaihtuahna phak tawk a la ni rih awm e. Hei hi “Lamtang Policy/Politics " kan tih fo hi a ni.

He Anti/Pro policy hian a pawl lehlam lehlam tan hmasawnna leh thiltha a thlen mawh khawp mai. Kalphung ngheta kan lo neih tawhte thlawpa sahuai thing vawn tluta zui ngut ngut ringawt hi a finthlak ber lova, chute ang bawkin a aia kang tha zawk ngaihtuah chhuak chuang si lova, lo dodal rum ruat pawh hian awmzia a nei bik lo. He ngaihtuahna zik bul (Anti/Pro saltanna ) ata hi kan chhuah a hun tawh hle.

Anti/Pro sala tang chung chuan ngaihtuahna ngil, dik leh fim a hman theih loh. Kan ngaihtuahna ber salah a tan tlat avangin kawng thar a dap thei tawh lo., thih phah hial pawhin a bawitu(a pu ) thu chauh a zawm tawh mai thin a ni. Saltang a ni miau si a! Ka unau leh thian a nih avang ringawta kan kohhran/kan khawtlang chhiat phah tur pawh pawi ti lova a thu ka zawma amah ka thlawp mai chuan saltang nun neitu ka ni ang. Chuti ang bawkin ka lamtangte remruatna a nih loh vang maia kan kohhran leh khawtlang thatna tur ruahmanna ngei pawh thlawp thei lotu ka nih chuan saltang ka ni tho tho. Chuti ang mite chu kohhran leh khawtlang tan mi hmantlak loh ber an ni a, chhunglam atanga chhiatna thlentu, "Trojan sakawr " te an ni. Pawnlam hmelma aiin chhunglam hmelma an hlauhawm a, hneh an har fe zawk. Tunlai Zo Kohhran leh Khawtlang hian chhunglam hmelma a ngah lutuk ta deuh a ni lo maw?!

Globalization hmanraw chi hrang hrang heng internet, computer, TV leh mobile phone te chen hian an nghawng tha lo leh chhiatna an thlen theihte hmu phal lovin pawm bet bur lo ila. A lehlamah pawh, ka do avanga bo vek tur pawh ni hlei lo, awmze nei lova lo tawng pawng do rik ngawtin awmzia a nei lo tih hriain a hman dan dik leh tha ngaihtuaha lo dawnsawn dan zir zawk ila. Chu chu kan sawttlanna tur a ni.

Thingpui kan khilai theih leh dawra kan hruai luh theihte ni lo chu hmelma dova do hi misual awm dan a ni a, kohhran leh khawtlang phatsantu a ni. Kan kohhran/kan khawtlang thattlanna leh hmasawnna tur a nih phawt chuan thingpui no khat mah ka la insak ngai loh leh ka la hmelhriat ngai loh mi thar leh khawte pa berhchep thu pawh ni sela, ka thlawp mai tur a ni. Chu nun leh ngaihtuahna chu a ni ngaihtuahna chungnung, engkim dik tak leh fel taka ngaihtuaha mi zawng zawng thattlanna duhtu chu! Chu chu Anti/Pro piah ram panna kawng chu a ni a, chutah chuan diknain hma a hruai a, hmasawnnain a hnung a zui thin a ni. Lamtang politics-in a tihbuai phak loh, chu zalenna ram atang ngei chuan politics khelh ka duh a ni.

Politics Ka Khel Dawn

Unaute u, vawiinah hian kan ram leh hnam, kohhran leh khawtlang tan politics ka khel dawn a, ka party hming chu, "Siamthatu Pawl " tih a ni. Ka symbol chu "O " (zero/"o" bial ) a ni e. Ka party member-te chu "Ka lam tang " an ni tur a ni lova, "Lehlam tang " pawh an ni tur a ni hek lo. Kan ram leh hnam, kohhran leh khawtlang lam tang an nih chuan a tawk em em a, chuti ang chu an ni zawk ngei tur a ni. A chhan chu ka lam tang an nih chuan ka hlawkna tur chauh an buaipui ang a, kan kohhran leh khawtlangin a chhiatpui dawn a, lehlam tang an nih chuan an lam hlawkna ngaihtuahin kei min tihchhiat an tum ang a, kan kohhran leh khawtlang tho thovin a tuar dawn. Chuti ang a nih chuan kan party hming, "Siamthatu Pawl " tih hi hming hnaisai loah kan chantir hlauh dawn si a! Chuti ang thil a thlen chu ka phal mawlh lo a ni.

Kan party member kan lo pun a, kan chak deuh deuha thlantlin kannih chuan, "Chhunglam hmelma " kan hneh ang a, Anti/Pro saltanna atanga lo chhuakin dikna leh zalenna ramah nun khaw nuam kan chen tawh dawn a ni. Chu ram ngaia rum zawng zawngte u, in "Vote " pawimawh tak kha a hlu thei ang bera hman in duh chuan min "Vote " ngei ngei dawn nia. Ka lawm e. (I party-ah ka rawn lut ve nghal e.Ed. )

Thulakna: Hriatna Ro Bawm, December-2010