Plan Pawisa Liam Mizoram State Sum Bawm

Chanchinbumite zawhna chhangin Accountant General, Mizoram Vishal Bansal chuan tun laia lar tak leh inhnialna plan sum liam chungchang chu Mizoram state pawisa bawm (consolidated fund of the state) -ah a awm a ni a ti. Sawrkar (executive) atangin a liam a, Mizoram pawisa bawma awm chu State Legislature-in a remtihna (authorisation) hnuah hmanleh theih a ni ang a ti.

Hetianga sum hman loha liam avang hian sum lokal leh tur a nghawng thei ang em tia zawhnaah chuan Pu Vishal Bansal chuan ngaihdan a neih loh thu a sawi. Mizoram Accountant General hian nimin khan a pisaah chanchinbumite kawmin India Constitution anga March ni 5-a Mizoram Assembly-a lo pharh tawh "Report of the Comptroller and Auditor General of India for the year ended 31 March 2009" leh "Report of the Comptroller and Auditor General of India on the State Finances for the year ended 31 March 2009" chungchang a sawifiah a. Hengte hi mipui lehkha pawimawh a ni tiin C&AG website: www.cag.gov.in ah hmuh theih a ni a, Accountant General (Audit), Mizoram Office-ah hmuh theih a ni a ti.

Pu Vishal Bansal, nikum June ni 10-a a hna AG Mizoram zawm chuan heng Report pahnih tlangpui, a kaihtawi ziaksa chu chanchinbumite hnenah hian a chhiar chhuak a. Heng Report hi Mizoram Legislative Assembly-a Public Accounts Committee chuan a umzui thinin sawrkarah action lak turin a recommend leh thin a ni.

Kum 2008-09 khan Mizoram budget-ah pawisa Rs.3,553.78 crore a awm (pass) a ni a, heta tang hian hman zawng zawng Rs.3,005 crore a ni a ti a, hman loha dahthat (savings) chu Rs.547 crore a ni a ti.. Heng pawisa hmanbang (savings) hi Revenue Section-a grants 39 leh Appropriation pathum leh Capital Section-a Grants 18 leh Appropriation pakhat atanga saving awm Rs.578.03 crore atanga lo awm a ni a, hei bak a la chuanna Rs.30.13 crore hi Revenue Section Grants 4 leh Appropriation pakhat atangin a ni.

Accountant General chuan hetiang zat pawisa hman loha khek awmna chhan hi hnathawh muangchan (slow pace of programme implementation) a ni a ti a. Hetianga pawisa savings hi Constitution Article 205 angin tihnun (regularise) leh ngai a ni a ti.

Thulakna: Mizo Aw