PHE Engineer-in-Chief thin, Pawan Kumar chu sorkarin Consultant-a awm turin a ti a; he sorkar thupek hi Pawan Kumar hian Guwahati High Court-ah a khing lêt a, hemi chungchangah hian nimin khan Court chuan thutlukna siamin, Pawan Kumar chu sorkarin a dahnaa awm turin a hriattir.
Mizoram sorkar chuan, April thla khan SAD hnuaia Consultant atan a sawn a, mahse Pawan Kumar hian a zawm duh lo a, sorkar chu Court-ah a khing a ni. A thu thehluh hi Court chuan nimin khan a ngaihtuah a, Mizoram sorkar aiawhin, Advocate General, Biswajit Dep leh Addl. Advocate General Helen Dawngliani te an ding.
Pawan Kumar hian sorkar laipui atanga hmasawnna tur sum lo kal hna thawhnan hmang lova kîr leh ngai khawpin a ngaihthah niin an sawi a; a hnuaia thawk tumahin an thawhpui theih loh bakah, MR leh Workcharge-te hlawh pawh a hrènsak avangin, a office kai tur pawh an lo dang tawh a ni.
Thulakna: Vanglaini