Pathian lama kan tan chuan Mizote min chimral lo ang: CM

19/04/2010 16:18

Chief Minister Lal Thanhawla chuan, Mizote chîmral kan nih loh nan mipuite'n Pathian an hriat a pawimawh thu a sawi a, "Pathian kan lama a tan theih nan Pathian lamtang kan nih phawt chuan, Mizote hi chîmralin kan awm ka ring lo," a ti.

Chief Minister hian nimin khan UPC (NEI) General Conference hmannaah telin, thu a sawi a; Mizote chimrala kan awm lohna tur kawng nia a hriat sawiin, "Thil siam zawng zawng chunga chanchin tha kan hril chhung chuan, tute mah hi min chîmraltir lo ang tih ka ring ngam a ni," a ti a; chumi tur chuan eng kohhran mi pawh, Pathian lama tang hmasa turin a sáwm a ni.

Lal Thanhawla chuan, Pathian malsawm tlaka awm a pawimawh thu sawiin, "A malsawm tlaka kan awm loh chuan kan lamah a tang lo ang a, mal min sawm lo ang tih a hlauhawm," a ti. Ni tin nunah thianghlimna kawng zawh tur te, zuk leh hmuam leh ei leh inahte insum turin mipuite a chah bawk a ni.

Thulakna: Vanglaini

Back