Parcel Marriage (Bungkus)

Hun-in min phut anga kan tawn mek, “Parcel Marriage (Bungkus )” tia kan sawi hi a nihna takah chuan “Proxy Marriage ” tih zawk tur a ni. Sipai, hna dang dang pawimawh , zirna, kualzin laklawh, khuahkhirhna chi hrang hrang leh thil dang remchanlohna pawimawh  avanga mo tur emaw, a pasal tur zawk emaw tel remchang lo inneihna (palai hmanga buatsaih inneihna )ang hi “Proxy Marriage ” chu a ni. He “Proxy Marriage ” hi thil chhuak thar a ni lova, kum sang liam tawh atanga an lo chin tawh a ni. Kum 1810-a ram latu ropui Nepoleon-a’n Marie Louise-i a neih dan kha, khawvel hriat tham mi lar zinga “Proxy Marriage ”-a inneihna hmasa pawl a ni awm e.

Hun inher danglam vanga tulna-in a tha tur ang bera a hrinchhuah, tunlaia nupui pasal kan inneih dan hi thil tha lo – hnam phatsanna leh hnam boralna anga sawi thinte hi ngaihdan hlui vuan tlut thin, changkanna leh hmasawna man pha lo, thlirna zim lutuk atanga thil thlir thin an ni tlangpui.

Kan huntawng-ah mahni ina tawm tlut tlut te, mahni veng/ khua nula rim tlut tlut te, pakhat thawhchhuah chhungkuaa rin luih luihte thil theih a ni tawh lo a, fin-thiam leh kut-thiam hrang hrang zirin emaw, hmasawnna leh changkanna hrang hrang zawngin hmun danga fehchhuah a tul a ni. Hmasawn tum lo leh changkan tum lo ram, hnam, sakhua reng reng an ding chang dawn lo a, chuvangin, ram tin, hnam tin, sakhaw tinte chu hun umin an intlansiak mup mup reng a ni.

Harsatna, pawimawh leh tulna  avanga hmun danga awmin ama mi leh sa, ama pian leh murna rama awm, ama sakhaw biakpui ngei nupui/ pasal atan a ngen chu thil tha ber a ni. Chu lo rengah pawh hmun dang ami leh hmun dang ami an hmelhriat a, an innei hi thil thiang a ni a, kan huntawng-in a hrinchhuah a ni. Hun hi dodal vak chi a ni lo. Hun inher danglam zel kara Khuanu’n a tha tur ang bera a ruat tunlai kan inneih dan hi thil tha tak a ni – Hun ruattu leh vawngtu chuan mihringte tana tha turin rem tha takin a ruat zel si a.