PAP Chungchangah Tlawmngai Pawlten Memorandum Thehluh Tum

16/02/2011 19:43

Dt. 15th February, 2011 (Thawhlehni) chawhma dar 11:00 hian Mizorama Tlawmngai Pawl lian - Mizo Zirlai Pawl (MZP), Central Young Mizo Association (CYMA), Mizo Hmeichhe Insuihkhawm Pawl (MHIP) leh Mizoram Upa Pawl (MUP) hruaitute leh Mizoram Kohhran Hruaitute Committee (MKHC) hruaitute chu Central Sorkarin Protected Area Permit (PAP) Dt. 30th December, 2010-a kumkhat atan hlih a nih chungchangah MHIP Committee Room-ah Joint Meeting neih a ni. Pawl hrang hrang hruaitute an kal kim hle a ni.

Pawl hrang hrang aiawhte hian Central sorkarin kum khat chhung atana PAP a hlih chungchang leh hemiin a nghawng theih thilte uluk taka sawiho a ni.

Meeting chuan Mizo mipuite rawn lova Central sawrkarin PAP a hlip hi tha a ti lova, hemi chungchangah hian Central sorkarah Memorundum changtlung tak thehluh tur buatsaih nise, PAP guide line pawh siamthat a nih theihna tura hmalak nise an ti.

PAP manual-a Christian Missionaries chungchang khirh taka tarlan pawh siamtha tura hmalak nise Memorumdum buatsaih chu hun remchang hmasa berah la thlir ho leh tur a ni.

PAP hlih a nih avanga lungawilohna lantir nan leh hun lokal zela nghawng tha lo tak a neih lohna turin demonstration neih tura inbuatsaih nise, demonstration neih dan tur leh tul dangte lo ruahman turin MZP te ruat an ni bawk. Hei hi hun remchangah la thlirho leh tur a ni ang.

Back