Pakistan-a Ruah Sur Nasa , Tui Lian Vanga Thi Zat 1100 Tling Tawh...

03/08/2010 00:25

Kar kalta atanga ruah sur nasa tak leh tui lian vanga Pakistan-a mitthi zat chu mi 1100 aia tlem lo an tling tawh a ni. Ruah sur nasa avang hian lui tam tak a liam a, khua a la a, kawng leh lei(h) a tichhia a, power supplies thenkhat a tichhe bawk a ni.

Tunah hian mi maktaduai khat leh a chanve aia tlem lote chu tanpui ngai an ni .

Khyber-Pakhtoonkhwa - health minister Syed Zahir Ali Shah chuan , “ Mi nuai khat velte chuan tunah hian tuihri leh pum lam natna an kai niin kan chhut a, chu’ng zinga a tam ber chu naupang an ni e,” tiin AFP a hrilh.

UN , US leh China te chuan Pakistan tanpui tur hian thu an tiam tawh a ni.Tun tum Pakistan-in chhiatna a hmachhawn danah hian sorkar chuan dem a hlawh hle a. Pakistan sorkar chuan a mipuite tanpui nan a thawk tha lo a, a che muang chherh chhurh hle , niin mi tam takin an dem. He tih lai hian Pakistan sorkar chuan sipai 30000 leh helicopter dozen tam tak hmangin theihtawp chhuaha chhanchhuah hna leh chhawmdawl hna an thawh mup mup thu an aupui ve reng bawk.

Tunah ruah sur hi ziaawm angin lang mah se, reh mai a hneha nasa lehzual tura chhut a ni. Pakistan-a he ruah sur nasa leh tui lian hi kum 30 chhunga a nasat ber tum a la ni.