PADMA AWARDEES-TE CHAWIMAWINA HLAN

Vawiin chawhnu dar 1:00  khan Zolife Magazine buatsaihin I&PR Auditorium-ah  Mizo zinga India Sorkar in Civil mite chawimawina sang (Padma Awards) a lo hlan tawhte chawimawina hun leh J.F. Laldailova lehkhabu ziah “German Ral Run & Thungaihnawm Dangte” tlangzarhna neih a ni a, Pu Lalrinmawia Ralte, Parliamentary Secretary chu khuallian niin Padma Award dawngtute chawimawina thilpek a hlan a, Pu L.Keivom ,IFS (Rtd)-in lehkhabu hi a tlangzarh thung a ni.

Parliamentary Secretary  Pu Lalrinmawia Ralte chuan thangtharten kan Mizo hranghlui India chawimawina sang Padma Award dawngtute chawimawi duhna thinlung an nei chu lawmawm a tih thu sawiin, tunlai Mizo mipuite hian Padma Award hlutzia hi kan hre tawk lo ni a a hmuh thin thu a sawi a, Award tenau dawngtu mi chi hrang hrangte kan hlut pui viau lai a chawimawina beisei miah lova ram leh hnam thatna tura an tha leh tui sengtu India ram mipui maktaduai sang khat chuang zinga Sawrkar laipuiin chawimawi tlak leh phu ni a a ngaih vanga India rama civil mite chawimawina sang a hlan kan mizopuite ngei kan hrechiang lo thin chu kan inenfiah a ngaih thu a sawi a, anni ngei hi Thangchhuah Diar khim phu ngawih ngawihte an nih thu a sawi a ni.

Mizo zinga India chawimawina sang (Padma Award) dawngtu vawiina chawimawina hlante hi  Padma Bhusan pakhat leh Padma Shri 19 an vaiin mi 20 an ni.

Padma Award dawngtute chawimawina hlan anih zawh hian J.F.Laldailova lehkhabu ziah “German Ral Run & Thungaihnawm Dangte” tih chu Pu L.Keivom IFS  (Rtd) chuan a tlangzarh a, hemi hnu hian J.F.Laldailova kutchhuak leh sulhnute chhui hona hun hman a niin mi pawimawh thahnem takin thu an sawi a ni.

Thulakna: DIPR