Oil in harsat lam pan zel

Mizoramin Oil lakluhna pakhat chiah nei,Oil Depot lian zawk a mamawh bawk

Mizoramin tuialhthei (oil) a lakna hnar pathum zinga pakhat chauh tunah hian lak theih niin, state dangah bandh leh harsatna hrang hrang a awm reng bawk avangin MiZoram chuan oil hnianghnarin a hmu mai thei dawn rih lo nia thu dawn a ni.

Aizawla Oil India Corporation (IOC) hotute hnen atanga thu dawn danin Mizoramin oil a lakna Vairengtea Sattelite Oil Depot chu siamthat (maintenance) leh inspection neih a nih avangin tunah hian oil engmah a awm lova. Mizoramin oil a lakna hnar ber Silchar-a Ramnagar-ah pawh tunah hian oil phurh tur a awm tawh lo bawk. Tuna hian Betkuchi, Guwahati atang chiahin Mizoram-in oil a lalut a ni.

Mizoramin oil a lakluhna hmunpui ber thin Ramnagar hian Lumding atangin rel hmangin oil a lalut thin a. Amaherawhchu, kumin June ni 15 atang khan NC hills-a kawng min leh harsatna hrang hrang vangin oil hi phurh luh a ni tawh lo.

Kawngmin leh chhe lai te siamthat a nih hnu-ah July ni 3 khan Badalpur atanga Lum-ding thleng rel tlantir leh chhin a ni a, mahse kawng a la hnip avangin rel pawh hi a chesual leh a, hei vang hian engtikah nge Ramnagar-ah oil hi phurh thlen leh theih a nih dawn tih hriat theih a ni rih lo a ni.

Ramnagar lamah oil phurh tur a awm tawh loh avangin Guwahati-a Betkutchi atangin tanker ten oil an phur a, kawng a hlat bakah bandh leh kawng tha lo tam tak a awm a, bandh leh harsatna dang tam tak a awm bawk avangin kar khat chhungin Mizoram an thleng thei tawk nia thu dawn a ni.

Tunah hian Mizoramah oil phur (tanker) 70-80 vel awm anga chhut a ni a. Tanker 30 rual vel zet Ramnagar-ah oil changa an din bakah, Guwahati atanga oil phurtuten kawng lakah hun rei tak an hman thin avangin chawhrualin nikhatah tanker 5 (diesel & petrol phur) pawh Mizoramah thleng pha lo anga chhut a ni.

IOC thuneitute chuan Mizorama tanker zawng zawngte chu mipui tana thawk an ni tih inhria a, kawng chhia leh harsatna karah pawh Guwahati atanga oil phur hram hram turin an ngen tih an sawi bawk a ni.

IOC Aizawl Sales Area, Deputy Manager chuan, Mizorama oil harsatna chu petrol pump neitute leh department lam thiamloh vang a nih loh thu sawiin, an thunun theihloh harsatna  (beyond control) hrang hrang thleng vang a nih thu a sawi a, ‘harsatna siam zawng leh inpuhmawh zawnga thil tih hun a ni rih lo,’ a ti bawk.

Thulakna: The Zozam Times