Naktukah chhiarpui tan dawn : Mizoramah mihring nuai 11 vel awm beisei a ni

Kum 10 dana neih thin India ram chhiarpui (census) chu vawiin hian Mizorama a thawhkhatna atan tan a ni dawn a. Mizoram rual hian Jammu & Kashmir, Rajasthan leh Bihar-ah te pawh vawiin hian tan a ni ang.

Vawiin khan I & PR Auditorium-ah Census Commissioner of India, New Delhi atanga lokal S.K.Chakraborty, Dy.Director General chuan press conference kovin, vawiina chhiarpui neih tur chungchang hi a sawi a, ‘2011 chhiarpuiah hian Mizoram-ah mihring nuai 11 vel an awm beisei a ni,’ a ti.

Chhiarpui hi thawhhnih (first phase leh second phase) -a then a ni a. Tun tum hi first phase niin April atang khan tan a ni a, September, 2010 chhunga zawh tura ruahman a ni. Hemi chhung hian In awm zat leh National Population Register (NPR) atana thil pawimawh lakkhawm (collection of data) neih a ni ang.

Thawhkhatna (houselisting and housing census)-ah hian eng ang In nge awm a, In engzat nge awm tih te, chu In-ah chuan eng thil te nge an neih, tui a awm tha em, electric a awm tha em tih leh thil dang tam tak an zirchiang dawn a ni.

A thawhhnihna hi February ni 9-28, 2011-a neih tur a ni a, chutah chuan mihring zat chhiarpui tak tak neih a ni ang.

2011 chhiarpui hi India rama chhiarpui neih vawi 15-na tur a ni a, Independence hnu-ah chuan a vawi 7-na tur a ni. India ram chhiarpui hi khawvela chhiarpui hautak leh lian ber ni tura ngaih a ni bawk.

2011 chhiarpui hian danglam-na bik a nei dawn a, chu chu National Population Register (NPR) kalpui nghal tur a nihna hi a ni.

NPR hnuaiah hian mitinin Unigue Identification Number (UID) an nei ang a. Kum 15 chin chung lam India khua leh tui te ziah luh vek tur an ni. Chumi hnu-ah Voters ID card tiat vel ‘Smart Card’ an tih chu pek vek an ni ang a, hetah hian hming te, veng te, nihna leh thiamna, fingerprint leh thil pawimawh dang chu a awm kim vek dawn a ni.

He card hi kum 15 chin chung lam, India khua leh tuiin an nei vek tur a ni a, tangkaina tam tak a nei dawn a ni.

Tun tum chhiarpuiah hian India ram State leh Union territories 35-ah district 640, Tehsil 5767, khua (town) 7742 leh thing-tlang khua nuai 6 vel a huam dawn a. In vaibelchhe 24 vel a, mihring tluklehdingawn 1.20 vel chu tlawhchhuah vek tur a ni.

Chhiarpui hna thawktu hi mi nuai 25 vel zet an ni dawn a, chhiarpui atan hian paper ringawt pawh metric ton 12,000 vel sen a ni ang.

India ramah chiarpui hi kum 1872-an neih tan a ni a, chhiarpui hmang hian India ram mipui tam zawng te, an thil neih te, hnam hrang hrang leh sakhaw hrang hrang zat te, In awm zat leh, ziak leh chhiar thiam zat leh mipui hriselna dinhmun thlengin tarlan a ni thin a. Hmasawnna hnathawhna atana tehfung leh hmanraw pawi-mawh ber zinga mi a ni.

Chhiarpui chu :

Mizoram District 8-ah, Principal Census Officer (DC te) kaihhruaina in chhiarpui hi neih a ni ang.

Mizoram hi Charge Officer huam 92-ah then a ni a, census ennumerators 2354 leh supervisors 392 an awm ang.

Census-ah hian Rs. vbc 3539.24 vel sen a ni ang.

Tun tum hi chhiarpui neih vawi 15-na a ni a, Independence hnu-ah a vawi 7-na a ni.

Chhiarpui hnathawktu mi nuai 25 an awm ang a, paper pawh metric ton 12,000 hman a ni ang. Tawng hrang 18-in chhiarpui kaihhruaina ziak a ni.

Tun tum chhiarpuiah hian National Population Register (NPR) neih nghal tur a ni a, India mi kum 15 chunglam chuan Unique Identification Number (smart card) an nei vek ang.

Thulakna: The Zozam Times