Naga-te'n Manipur-a curfew hlih phut

Manipur leh Naga inkar khî avangin Manipur state chhunga Naga mite chenna bial hmun thenkhatah curfew puan a ni a, hei hi Naga pawl pakhat, Naga Hoho chuan duh loin, Manipur-a Naga-te an chet sawn theih nan curfew hlih a nih theih nana hma la turin sorkar laipui an phut.

Manipur state chhung, Naga nena an inrina bul hnaia Naga-te chenna bialah curfew puan a nih avangin, Manipur-a Naga eng emaw zat, an in chhuahsantute chu an haw mai thei lo a ni. Ramri bula Mao (Manipur) khua leh a chhehvela Naga mi 500 vel chu May 6-a Manipur Police-te chetna avangin Nagaland an pan a, Manipur police-te chetna avang hian zirlai pakhat thiin, mi dang 80 vel an hliam nia sawi a ni.

Naga Hoho President, Keviletuo Kiewhuo chuan, "Sorkar laipuiin Nagaland leh Manipur thatna tur a duh tak tak a nih chuan, Naga-te Manipur-a an chenna inah ngei an haw theih nan hma a lak ngei kan beisei. Tunah hian Manipur-a Naga mite chenna biala curfew puan chu thlahdul a ni tawh a, Naga-te zalen taka an haw theih nan curfew hi hlih vek tur a ni," a ti.

Manipur leh Nagaland ramria Mao gate-ah Manipur police-te an duty thin a; Manipur police-te hi thlâk turin sorkar laipui chuan Central paramilitary force-te tirh a tum tih Union Home Secretary, GK Pillai chuan a lo puang tawh a; hei hi Naga Hoho chuan an duh lo hle bawk.

Hetih lai hian, Tangkhul Naga Frontal Organisations chuan, Manipur khawpui Imphal-ah chuan mi thenkhatin bus leh motor danga chuang Naga-te tibuaiin, an ei tur neih leh bungruate an chhuhsak thin niin an sawi a; hemi chungchangah hian Ukhrul district DC-ah FIR thehlut mah se, Manipur sorkarin a hre duh lo lui niin an sawi bawk.

Manipur-ah hian ni tin mamawh a váng tawh hle a, a awmchhunte pawh a man a sang hle a. Mamawh zualpui, damdawi, oxygen leh thil dangte chu sipai thlawhna hmangin Imphal-ah phur thlen mek a ni a, venhimna hnuaiah Silchar-Mizoram-Churachanpur kaltlangin oil, gas leh ni tin mamawh dangte chu motor hmanga phurh mek bawk a ni.

Thulakna: Vanglaini