MZU Luhnatlak Lohah Siam Thei

Sports & Youth Services Minister Pu Zodintluanga chuan zirlai pawlte chu Mizoramin University a neih chhun MZU hi university luhna tlak lohah siam mai a hlauhawm thei em tih ngaihtuah turin a rawn. Nimin piaha Mizo Students Union (MSU)-in kumina MBSE hnuaia HSSLC Exam-a tithate chawimawina inkhawmah khual lian nia thu sawiin Pu Zodintluanga chuan Mizoram University-in hna an lak mekah Mizote lak an nih theih nana zirlai pawlten tan an la lawmawm a ti a, chutih rual chuan "Kan university neih chhun hi Mizote kan inthun tumna lutukah university luhna tlaklo kan siam ang tih a hlauhawm hle a ni" a ti.

Minister chuan zirlai pawlte chuan MZU hi Mizoram pawn atang pawha thawh leh luh chakawma siam tha an ti em tih ngaihtuah turin a rawn a. Mi hausa leh a thei deuh hlekte chauhin phai lam zirna hmun thaa an fate lehkha an zirtir chhan chu college leh university-ahte zirtirtu faculty an neih that vang a ni a ti. Faculty an neih thatna chhan pawh University-a thawk tur an lak uluk vang a ni a ti. ‘Kan University neih chhun hi pawn lam leh hmun dang atangin hnam dangte pawhin an zir chakna tura boruak siam a pawimawh a ni" a ti.

Pu Zodintluanga chuan khawvel zau zawk hmasawn ruala pen ve turin mahni tih tur tih hi a pawimawh mai ni lovin ‘kan chhandamna a ni’ a ti a. Mizoramah mahni nihna leh dinchhan hre mumal lo ang maia mimal leh pawl tamtakte an khawsa fo chu hmasawnna aia hnungtawlhna a ni a ti a. MSU pawh ke pen uluk a, zirlaite welfare ni loahte an hun leh thate seng lo turin a rawn.

Thulakna: Mizo Aw