MSU-in MZU chungchang HRD Minister-ah thlen

Sorkar laipuia hotu thenkhatte dàwr tura Delhi-a thang mek, Mizo Students’ Union (MSU) Gen.Hqrs. hruaitute chuan nimin khan Human Resourses Development (HRD) Minister, Kapil Sibal an hmu a; Mizoram University-a hna lâk chungchang leh nikum September thlaa MZU hotute leh MSU inremna chungchangte bakah, category reservation leh MBBS seat reservation chungchangte an thlen.

MSU General Secretary, Zodinpuia hnen atanga Vanglaini thu dawn danin, MSU hruaitute hian HRD Minister hnenah hian September 15, 2009-a Pachhunga College-a MZU hotute leh MSU inremna ziah an thehlut a; hemi chungchangah hian Union Minister chuan, MZU thuneitute'n dan kalha thil an ti a, UGC thuneitute hnenah chhui zui tura a lo hrilh tur thu, Minister chuan a lo hrilh a; inremna an siam tawh a nih chuan, inremna anga kal a dik tur thu a sawi.

MSU hian MZU-a zirtirtu lâkna kal chho meka MZU-in 'four first class' criteria an hman thu Minister hi an hrilh a; Kapil Sibal chuan, 'four first class' tih chu khawi university-ah mah an hman a hriat loh thu a sawi a, hemi chungchanga MZU kalpui dan chu chiang zawka thawn tha leh turin MSU hruaitute chu a chah.

MZU hna laka reservation roster siam chu university thuneihna a nih thu leh, ram leilung fa tling leh tlak an awm chuan duhsak theih a nih thu Minister hian a lo hrilh niin, Zodinpuia chuan Vanglaini a hrilh a; Mizoram sorkarin holiday a puana MZU chawlh leh chawlh loh chungchang chu MZU thuneitute'n an duh anga an kalpui theih a nih thu leh, state sorkar pawhin a tul anga hma a lakna tur a nih thu a lo hrilh niin a sawi bawk.

MZU Vice Chancellor leh land compensation chungchangah, a tirah compensation la thei tur mi 95 an awm laiin, Gauhati High Court-in mi 53 chauh pek turin thupek a chhuah thu leh, he thilah hian corruption a awm nia an hriat thu an thlen chu HRD Minister chuan, UGC lamah inquiry lâktir a nih tur thuin a lo chháng a ni.

MSU hian Central Pool atanga Mizoramin MBBS seat 20 a hmuh theih nan HRD Minister chu hma la turin an ngen a; Minister chuan, seat 10 tal an hmuh belh theih nan Medical Council-ah bawhzui a tum thu a lo hrilh niin, MSU Gen. Secretary chuan Vanglaini a hrilh a; Science subject-ah NET Exam Centre, Mizoram University-a dah tura an ngenna pawh tihhlawhtlin a lo tiam niin a sawi bawk.

Hmarchhak state-ah ST an tam avangin, Category Reservation-in ram leilung fate harsatna a thlen thu MSU hruaitute chuan Union Minister chu an hrilh a; Minister chuan, hemi chungchangah hian Parliament-in Constitution Amendment siam a tum mek thu leh, chutah chuan a tul anga lo bawhzui a tum thu a lo hrilh a ni.

HRD Minister hi MSU hruaitute hian Mizoram tlawh turin an sawm a, Minister pawhin a hma thei ang bera Mizoram tlawh a tum thu a hrilh. MSU hruaitute hian President, Pratibha Patil hmuh tumin appointment an dil mek a, Mizoram MP, CL Ruala'n a dilpui a ni. MSU hruaitute chuan, New Delhi-ah Mizoram House-a thawkte'n an tul anga an buaipui avangin lawmawm an tih thu an sawi.

Thulakna: Vanglaini