MPCC+ZNP in AMC Sorkar tur thlang fel

Aizawl Municipal Council (AMC) sorkar ruangam tur chu Inrinni khan party pahnih MPCC leh ZNP chuan thlang felin, AMC sorkar hmasa ber chairman atan CT Zakhuma, INC, Nursery Veng, Ward No.XV Councillor chu thlan a ni.

AMC vice chairman atan hian Ward No.VII Councillor, Zarzoliana, ZNP chu thlan a ni bawk a. Executive Councillor atan mi pathum - INC atangin Ward No.X Councillor Lalzirliana, Chawnpui Vengv leh Ward No.XVII Councillor F Lalhuthangi, Republic Veng leh ZNP atangin Ward No.1 Councillor Hmingthanzami, Chaltlang te thlan an ni bawk.

AMC sorkar hmasa bera Executive Council tur hi Inrinni khan chief minister cabinet room-ah Congress leh ZNP hruaitute thukhawmin an thlang a. Congress leh ZNP hruaitute hi a hran ve vea thukhawmin nihna insem dan tur an siam fel chu party pahnihte hian lungrual takin an pawm a, chumi hnu-ah Councillor thlan tlinte hian Executive Council member ture hi an thlang leh niin thudawnna chuan a sawi.

AMC sorkar din felna tur hian Mizoram sorkar chuan vawiin hian notification tichhuakin, a baka tihtur tul awmte chu district bawrhsap lamin an thawk zui tawh dawn nia hriat a ni a. District bawrhsap hian AMC Councillor atana thlan tlinte hnenah hian rinawmna thutiam a laktir hun tur hi vawiina notification-ah hian tel tura beisei a ni.

Aizawl Municipal Council a taka kalpui tur hian Councillor thlan a nih thu sorkar gazette-ah chhuah phawt a ni ang a, hemi hnu thla khat chhungin Executive Council dingin, District Magistrate (bawrhsap) in rinawmna thu tiamtira a lakluh hun erawh chu sawi theih a la ni lo.

Hetihlai hian Village Council te chu a kal ngaiin a la kal zel rih dawn nia hriat a ni. Aizawl Municipal council din a nih hnu-a Village Council thlaktu tur Local Council thlanna neih a nih hma chuan, VC hian an tihtur tiin Local Council ai an awh zui rih mai dawn tih thudawnna chuan a sawi. AMC inkaihhruaina-a a lan dan chuan chairman hian executive council member-te chanvo tur semin hna chanpual turte a siamsak ang.

Thulakna: The Zozam Times