Mobile phone bill atan thla khatah Mizoram-in Rs. vbc 5 chuang seng!

Mizoram chhunga mobile neituten thla khat chhunga mobile bill atana an senso zat chu a tlem thei ang bera chhutin Rs. vbc 5 (nuai 500) chuang a ni.

Economic Survey 2009-2010, Assembly Session neih zawh taka pharhin a tarlan danin January 2010 thleng khan Mizoramah mobile phone subsciber 5,61,917 an awm a. Subscriber pakhat hian thla khatah a tlem thei ang bera chhutin Rs. 100 zel seng ta ang sela, thla khat chhunga telephone bill atana pek zat chu Rs. 5,61,91,700/- a ni. (Connection tam tak hi a nung tawh kher lo thei a. Chuvang chuan a bill hi a tlem thei ang bera chhut a ni. Subscriber thenkhat chuan thla khatah Rs. 2000/- dawn te telephone bill atan an seng thin).

Mizoramah hian mobile phone privider company paruk (6) an awm mek a, heng zingah hian Airtel company chuan subscriber an ngah lawt lak a, January 2010 thleng khan subsciber 1,92,000 an nei.

BSNL chu subscriber ngah ber dawttu niin mi 1,20,378 an nei a, pathumna chu Reliance company niin subscriber 1,01,246 an nei. Aircel company in dawt lehin subscriber 68,500 an nei a, Tata Indicom in 56,190 neiin Vodafone chuan subsricer 23,423 neiin tun dinhmunah an nei tlem ber rih a ni.

Telephone bill atana thla khata Rs. vbc 5 seng anga chhut hian kum khat chhung chuan Rs. vbc 60 vel zet mobile phone bill-ah mipuite hian sum an seng tihna a ni.

Mizoram politics khawvela inbeihna ber atana hman leh, project lian tia sawi ve thin State Referral Hospital hi a project estimate chu Rs. vbc 40.53 ni a, kum khat chhunga mipuiin mobile phone bill atana senso zat hian hetiang Hospital lian hi a sak theih daih tihna a ni!

Thulakna: The Zozam Times