MNF in khenbeh tum mahse min khengbet thei lo - Lalthanhawla

Pu Hawla chuan ramhnuai atanga an chhanchhuahte'n khenbeh an tum a, mahse khenbeh ngaihna an hre lo a ti a, an sorkar hmasak khan a lakah Pastor pension-in PIL a thehlut a, mahse kha Pastor khan thu dik lo a sawi a, kha a thubuai kha an sorkar hmasak chhung khan tih tawp a tum lova, an tlak hnu khan MNF-te'n an tharthawh leh a, khenbeh tumin nasa takin hna an thawk a, case IO-te'n ram chhung hmun hrang hrangah kalin a eiruk ni-a an rinhleh hai chhuah tumin an kal ngat ngat peih a, mahse an hmuchhuak lo mai ni lovin thuhretu-a an koh zawng zawngte pawhin a eirukna an hre thei lo tih a sawi. Chief Minister chuan Bible-in hun hnuhnungah Krista ti duhdah tute an lo chhuak ang tih a ziak a, chung Krista ti duhdah tute chu BJP leh an sangngawi zawnpui, RSS te, Baj Rang Dal-te an ni a, chungho zawmtute chu ringtu inti, MNF-te hi an ni a ti a, Krista zawnchhuah ti duh dahtute thawhpui hi chu Pathian hian mal a sawm lovang tih kum 10 kalta khan Mizoram-in a hria tih a sawi. Pu Hawla chuan MNF hian ngam leh ngam lo leh tlanchhe chungin zalenna an sual a, kum 20 tal tap ngam leh ngam lovin ramhnuaiah an awm a, chuti chungin Pathianin a hlawhchham tir a, chuta tanga chhanchhuak tura Lalpan a ruat chu Congress Party hi a ni a ti a, Congress chu remna leh muanna siamtute an ni a, Lalpan khawvelah remna leh muanna a awm theih nana lalthutphah a ken tirte chu Mizoram Congress Party chauh hi a ni a, Lalpan Congress Party chu a chawimawi a, Congress Party chu engtik lai pawha lawmthu sawi tur an nih thu a sawi.

Chief Minister chuan eiru sorkar nih ai chuan malsawmna tam tak dawnga nuam tawl sorkar nih hi a ropui zawk a ni a ti a, lawmna chang hria sorkar nih hi a ropui a, nuam leh lawm hi Mizoram Congress-ah hian a awm reng a, Kohhran-te'n zalen taka Chanchin |ha an hril theih nan Lalpa'n Party a hman chu Congress Party hi a nih avangin Congress Party chu a nuam lo thei lo a ni a ti a, sorkar laipuiah Congress a sorkar loh chuan Ringtute'n harsatna an tawk nasa ziah a, chumi laka zalen tura Pathian-in Party a hman chhun chu Congress Party hi a nih thu a sawi. Pu Hawla chuan Pathianin mi chapo-te a tung ding ngai lova, thuhnuairawlh te, inngaitlawmte a chawimawi thin a, Congress Party-in malsawmna a dawn zawng zawng chu mi dang tan malsawmna a ni tur a ni tih a sawi.He inkhawm hi MPCC Treasurer, Pu H.Liansailova'n a kaihruai a, thusawitu dang, MPCC Sr. Vice President, Pu R.Lalzirliana chuan Rev. Chanchinmawia thattu-ah Pu Zoramthanga puh a nih chuan tu nge thiam chan tir ang, a thatu-a puhte chuan a that lo a ni tu nge ti thei ang, chutiang ang chu chhar a har khawp ang a, Rev. Chanchinmawia thihna anga tual thihna hi an sorkar hunah chuan thleng ve lo se tih chu an duh dan a ni a, a thlen ve lohna turin theihtawp an chhuah tih a sawi. Chief Minister, Pu Lal Thanhawla chuan Congress Party hmuhsit nana NLUP hmangtute leh NLUP hmang dik lote chu NLUP an pe ve dawn rih lo tih a sawi.

He thu hi vawiina Congress Bhanvan-a Home Minister, Pu R.Lalzirliana'n a thubuaia thiam a chan a lawm sakna-a a sawi a ni a, Pu Hawla chuan NLUP chu Congress Party policy a ni a, a beneficiary chu Party mipui duh danin an kal pui ang a ti a, NLUP chu tunhma anga a pawisa faia inpek ang kha  ani dawn lo tih a sawi a, a dawngtute'n an hlawhtlinpui tur angin sorkar-in a bituk ang a, a hlawhtlinpuite chu sorkar-in pek leh dan kawng a dap ang a ti a, a hmang dik lote chuan a pung nen an rul ang a, an rul thei lo a nih chuan lung inah pawh an tang mai thei tih a sawi. Chief Minister chuan NLUP pawisa chu sorkar pawisa a ni a, MNF ho ang mai mia eiruk chi a ni lo a, hlawhtlinpui tak tak turin sorkar-in ruahmanna tha a siam a, Congress Party aiin Party dangin an nghakhlel zawk a, an sem lovang ti tute'n tunah chuan an nghakhlel ber a, kumin sorkar kum chhung chuan an sem lovang a, sorkar kum tharah sem tumin hma an la tih a sawi.