Mizoramin Cheraw lâr phah ang - Lucia

13/03/2010 16:55

VANGLAINI : Guinness Book of World Record Adujication Manager, Lucia Sinigagliesi chuan, Cheraw (Bamboo Dance) chu khawvelah a lâr tur thu leh, Mizoram ngei pawhin a lâr phah a rin thu a sawi.

Mizoramin Cheraw hmanga world record an siam leh siam loh endik tura lo kal, Lucia hian AR Lammuala Mizoramin record an siam thu a puan hnuah, I&PR Auditorium-ah thuthar thehdarhtute a kawm nghal a. Lucia chuan, "Kan website-ah Cheraw chungchang hi kan dah dawn a, kan lehkhabuah pawh a chuan ngei ka beisei a ni," a ti a, world record zawng zawng hi an record bu-ah dah kai a ni vek kher lo.

Mizoramin world record a siam theihna tura thawktute a fak a, "In inbuatsaihna a thain engkim a felfai hle a ni," a ti a, he record hi midangin khum tum pawh ni se, a harsat a rin thu a sawi.

Zawhna chhângin Lucia chuan, "Endik nana kan hman ber chu a rualin an lam tur a ni a, a lamte hian lam hi an thiam tak tak tur a ni a, minute nga chhung an lam tling tur a ni tih a ni bawk. An lam chhungin kawngpuiah endikin ka kal kual a, an thiam em em vek a, minute nga mai ni loin minute riat an lam a ni," a ti.