Mizoramah lir a nghing thei reng a, a hun erawh a hriat loh

Dr Lalliana Mualchin chuan Mizoram chu engtilai pawha lirnghin theihna hmun a nih thu a sawi a, lirnghing hmachhawn tura inbuatsaih a tul thu a sawi.   

He thu hi nimina Zoram Research Foundation (ZORF)-in I&PR Auditorium-ah ZORF Distinguished Lecture Series an buatsaihah a sawi a, ‘Earthquake Potential in Mizoram’ tih thupui an zirho.

Dr Lalliana Mualchin chuan, "Sumatra-a lirnghing awmna kawng (zone) kal zel hi Mizoram chhung emaw, a bulah emaw a kaltlanga hriat a ni a. He zone-ah hian lirnghing lian tak a lo awm chuan, matheiloin Mizoramin nghawr/nghîng nasa tak a tuar dawn tih a chiang hle a ni," a ti.

Lalliana Mualchin chuan, "Lirnghing hi Mizoramah thleng thei reng a ni a, mahse a thlen hun tur erawh chu hriat lâwk theih a ni lo," tiin, Mizoramah lirnghing zirna hmanruate tam zawk neih a ngaih thu a sawi. Seismic Consultant to the Govt. of Mizoram a nih angin, tunah hian Mizoram Seismic Map a buatsaih mek thu a sawi.

Lirnghing laka inrálrin dan pawimawh ber pakhat chu in leh kawngte mithiamte'n an duan anga sak/siam a nih thu leh, lirnghin huna chet dan tur ruahmanna fel tak neih a tul tih, Dr Lalliana chuan a sawi a, "Lirnghingin mi a tihlum lo a, insak tha lo emaw vanga chim hian mi a delh hlum zawk thin," a ti.

He hun hi ZORF Patron, Lalsawta, Education Minister-in a hmanpui a; ZORF Chairman Thangchungnunga'n a kaihruai a ni.

Education Minister chuan, lirnghingin harsatna leh chhiatna rapthlak tak a thlen theih avangin, inhrilhhriatna tam zawk neih a ngaih thu a sawi a; lirnghing chu thil thleng thei reng a nih avangin hmachhawn ngam a ngai a, sorkar leh mipuiin huai taka an ngaituah a tul thu a sawi.

He lecture series-ah hian DM&R, Geology & Mining Wing, ADA, Mizoram Home Guard, Fire Service, Town & Country Planning, HUDCO, Pollution Control Board, Mizoram Law Commission, MIRSAC leh Architect thenkhatte leh Mizo parâwnkai eng emaw zat an tel a; MLA pahnih leh Ex-MLA eng emaw zat an tel bawk.