MIZORAM BAPTIST KOHHRAN ASSEMBLY TIAK : Neih inang inneih pawm lo

16/03/2010 21:02

THE ZOZAM TIMES : Mizoram Baptist Kohhran rorelna sang ber Assembly vawi 114-na BCM Bazar Biak In, Lawngtlai-a neih chu Pathianni zan khan a tiak a. Kum 2011 BCM Assembly chu BCM Rahsi Veng, Lunglei-ah neih a ni ang. He khawmpuiah hian neih inang inkawp/awmdun ang chi te an pawm loh thu tarlan a ni a. Nau tihtlak leh Birth Control pawh nu nunna in a tuar dawn a nih loh chuan tha an tih loh thu an sawi bawk.

Baptist Kohhran khawmpui vawi 114-na, BCM Bazar Biak In, Lawngtlai-a neihah hian President thar Rev.C. Rothuama kaihhruaiin rorel inkhawm ni thum chhung neih a ni a. Rorel langsar zingah hian neih inang awmdun chungchang bakah birth control leh nau tihtlak chung-changte khelin hetiang hi thil diklo a nih thu an sawi.

Neih inang inkawp awmdun chu Baptist Kohhran chuan inneihnaah a pawm loh thu leh he thil hi tunhma tang tawha Kohhranin a duh loh leh a dodal tlat a ni tih Rev.Dr.K.Thanzauva chuan kan palai zawhna chhangin a sawi a. Heng mite chungah hian hremna (action) lak nise ti zawngin rorel inkhawmah hian sawi a awm a, chutiang zawnga thu tihtluk erawh a awm lo, a ti.
Birth Control leh nau tihtlak (abortion) pawh Baptist Kohhran chuan nu nunna in a tuar dawn a nih loh chuan thil tha a ni lo tih chu an ngaihdan a nih thu a sawi a. Birth Control chungchangah hian statement siam a ni a, hei hi rorel palaite hnenah semin pawm a nih thu a sawi bawk

‘Inkawp lo chi inkawp, mipa leh mipa, hmeichhia leh hmeichhia inkawp, nupa anga khawsa te dinhmun’ chungchang hi nikuma Synod Inkhawmpui, Mission Vengthlang-a neihah pawh khel a lo ni tawh a. Synod Social Front zirchianna ngaihthlak niin, chuta a lan dan chuan Presbyterian Kohhran 130 bawr velah hmeichhia leh hmeichhia inkawp tuak 31 leh, mipa leh mipa inkawp tuak 1 an awm tih hmuhchhuah a nih thu tarlan a ni a. Sawiho hnu-ah Synod-a thlen leh turin Synod Executive Committee-in zirchiangin hma lo la se tiin thutlukna an lo siam tawh a ni.

Baptist Assembly nizana tiak taah hian rorel inkhawmah tuna Mizoram Baptist Kohhran dinhmun thlirin, kum 10 lo la awm leh tur atan Planning Commission din remtih a ni a. BCM hnuaia thawktu hrang hrangte hlawh chungchanga Pay Commission Report pawm a ni bawk. Rorel palaite hian President Elect atan Rev Dr.K. Thanzauva an thlang a, Pro Pastor 6 chu Pastor-a nemngheh remtih a nih bakah, Pro Pastor 8 lak thar an ni bawk.

Nimin chawhma khan Pro Pastor 6 : V.Biaknungsanga, Lalbiakhlua Chawngthu, K.Lalmuanpuia, Lallsangzuala Sailo, C.Vanlalhruaia (Jr) leh N.Vanlalzuia te Pastor-ah nemngheh an ni a, chawhnu-ah Lalpa Zanriah Sacramen buatsaih niin, zanah President kal chhuak Rev.TC Laltlawmlova’n thuchah a sawi.

================

TUAI/PATIL CHUNGCHANG ZIRCHIANNA

Tlawmngai pawl thenkhatin Mizoram-a tuai/patil dinhmun an
zirchiannaa hmuhchhuah thenkhat —
* Mizoramah hian tuai hi 300 vel an awm
* Mipat-pui sex hmanpui tawh 83.33%
* Hmeichhiat-pui sex hmanpui tawh 30%
* Hmeichhia sex hmanpui chakna nei lo 63.33%
* Tuai nih chhan ber an pianpui vanga ngai 63.33%
* Mahni mipat pui it vanga tuai 20%
* Hmeichhe nih chak vanga tuai 13.33%
* Tuai zingah, naupan laia hmeichhe kawm nasa 63.33%, naupan laia
hmeichhe thuam inbel thin 43.33%, hmeichhe hminga koh thin 6.67%
* Patil zinga 73.33% chu kum 30 hnuai lam an ni. Kum 30-40 inkar 13.33%,
kum 40 chunglam 13.33%
* Mahni hmeichhiat pui sex hmanpui chak 20%
* Mahni hmeichhiat pui sex hmanpui chak lo 80%
* Tuai zawng zawng deuhthaw (93.33%) in Pathian thu zawmin an in hre lova, 6.67% te chuan Pathian thu zawmin an inhre thung.
* Patil zingah 33.33% te chuan tanpui ngai niin an in hria a, 6.66% chuan
tanpui ngai an inti lo.