Mizoram-ah naupang chhawr tam

Mizoram-ah naupang kum 5 leh kum 14 inkar hnathawka chhawr (Child Labour) an tam hle tih Ministry of Lobour, Government of India-in a chhinchhiah a. Census 2001-ah Mizoram-ah Child Labour 26,265 zet awmin, Census 1991-ah 16,411 an awm a, 1981 Census-ah 6,314 an awm.

 Naupang kum 5 leh 14 inkar hnathawka chhawr hi kum 2001 Census-a tarlan a nih dan chuan India ramah Uttar Pradesh-ah an tam ber a, naupang hnathawka chhawr hi 19,27,997 zet an ni a. UP dawtah hian Andra Pradesh (13,63,339), Rajasthan (12,62,570), Bihar (11,17, 500) leh Madhya Pradesh (11,17, 500) te an awm a ni. Lakshadweep-ah tlem berin 27 an awm a, 2001 Census-a India rama naupang hna-thawka chhawr zawng zawng chu 1, 26, 66377 zet an tling.

Inrinni kha khawvel puma naupang hnathawka chhawr dona ni ‘World Day against Child Labour’ a hman ni a. Hemi denchhen hian Mizoram State Legal Services Authority leh Centre for Peace and Development chuan I&PR Auditorium-ah ‘Right to Free and Compulsory Education Act 2009’ chungchang zirhona buatsaihin, school education minister Lalsawta’n khuallian niin a hmanpui.

Education Minister chuan miretheite dinhmun chawikang tur chuan zirna chu hmanraw tangkai tak a nih thu a sawi a. Naupangte zirna pek hian khawvel an dahchhuah theihna tur remchang a siamsak a ni, a ti a. Retheihna zawng zawng nuai bo thei lo mahse, zirna hian hausa leh rethei inkar zau lutuk tawh pawh thui takin a tiziaawm thei a ni, a ti bawk.

India ram state dangah te harsatna tam tak an neih laiin, Mizoram-ah chuan kan tih leh tih lohah a innghat a ni ber a. Thahnemngai leh tangrual taka tlawmngai pawlte leh sorkar an tanho chuan India hmarchhak mai ni lo, India ramah zirna lama ber kai kan ni thei tiin Lalsawta chuan a sawi.

Rethei leh hausa inkar zau lutukna hmunah khawsak a nuam tak tak lo tih leh, chutiang dinhmun chu Mizoram-in tawng tan meka a hriat thu Lalsawta chuan a tarlang a. Hemi siamthatna kawng hnai leh awlsam ber chu zirna a nih thu sawiin, ‘Zirna pek loh vanga khawilai quarry emaw-a thawkte hi zirna pangngaia kal ni se, ram hruaitu ropui leh khua leh tui tana mi tangkai leh chhenfakawm an ni lovang tih sawi theih a ni lo’ a ti.

Education minister chuan naupangte hnena zirna pek chu tihmakmawh (compulsory) mai ni lo, a thlawn (free)a pek tur a ni a, tih loh chuan dan anga inhrem theih hial a ni tiin naupangte hnena zirna pek pawimawhzia leh tulzia uar takin a sawi a ni.

Seminar-ah hian Aizawl khawpui chhung school hrang hranga zirtirtu sawm bikte an tel tha hle a. Lalhmachhuana, SDEO, Aizawl West leh Angela Ch. Ralte, Secretary, CPD te paper buatsaih zirho a ni a. Hun hmasa lamah Marli Vankung, Member Secretary, Mizoram State Legal Services Authority chuan thu a sawi bawk.

World Day Against Child Labour Day hi Kolasib district-ah District pumpui huapin Kawnpui Awithangpa Hall-ah District Legal Services Authority buatsaihin hman a ni a. R Malsawmdawngzuala, MJS, Civil Judge Kolasib te, Dr. HTC Lalrinchhana, MJS, Sr Civil Judge, Kolasib leh C.Duhveli, CDPO, Thingdawl ten naupang ten a thlawna zirna an dawn theih dan, naupangte himna leh enkawltute mawhphurhna naupangte dikna chanvo leh hnathawka chhawr khapna dan chungchangte zirtirna an pe a ni.

 ------------

 2001 Census-a naupang (Kum 5-14 inkar) hnathawka chhawr zat

N.E. State Working
Children

Assam 3,51,416
Meghalaya 53940
Nagaland 45874
Manipur 28836
Mizoram 26,265
Tripura 21,756
Arunachal Pradesh 18,482
Sikkim 16,457

Thulakna: The Zozam Times