MIZO THAWNTHU ( Unau Fanghma To Zawng )

Hmanlai hian unau pahnih hian fanghma to an zawng dun a. A u zawk chuan a hmu ve thei hauh lova, a nau erawh chuan, 'Hei pawh, hei pawh,' a ti a, a chhar theih bik avangin a em pawh a khat dawn ta mai a. Nakinah chuan a u mangang chuan, 'Kawlhte, ka tui pawh a hal zo tawh a, tirawh i fanghma kha inphel ang, a phel lehlam min pe ve ang che,' a ti a. A nau chuan a phal ta tlat lo mai a. A u chu a thinur ta em em mai a, fanghma lah chu a hmu ve thei si lo. A han dil leh thin pawhin a phal thei ngang lova, a tawpah chuan a thinrim chu sawntlung pawngah a ding a -

Sawntlung aw mi zial mi zial,
Ka nauvin fanghma pumkhat phel a phal love,
Sawntlung aw mi zial mi zial.
a ti a, sawntlung chu a inzialtir ta a. A ke a zialpil a, a hla kha a sa zel a, a kawng a thleng leh a; tichuan a pumin a pil ta daih mai a.

A nau chu duhtawka fanghma phur chuan amahin a hawng ta a. Tlaiah chuan a nu leh pate feh an lo hang a, 'Khawnge i u?' an rawn ti a. A u-in fanghma phel a dil thu leh a phalloh avanga sawntlunga a inzialtir thu chu a han sawi a, 'I va han sual em, va ko leh hmanhmawh rawh,' an ti a, a u ko tur chuan a va kal leh a -

Ka u aw lo chhuak lo chhuak,
Ka nu'n thi a lei ang che,
Ka pa'n dar a lei ang che.
Ka u aw lo chhuak lo chhuak,
a han ti a. Chutah a chhip a lo lang leh ta a. Zawi zawiin a lo chhuak hret hret a, a kohna hla a sak zel hnu chuan a pumin a lo chhuak deuh thawt a. A kephah a chhuahkim hma chuan a nau chuan, 'Hawh le, ka u, i kal ang' tih leh kaih a rual a, a u ke zungpui chu a chhum a, leichhungah a tang ta a. Chu chu tun thleng hian pasawntlungah a la to thin a ni.

Thulakna: Mizo Songs & Folktales by Dr.Laltluangliana Khiangte