MIZO TAWNG - THUMAL PAHNIH 'LEH' HMANGA SAWI KAWP THINTE (Chhunzawmna III)

D

·        (21) Dan leh hrai : ‘Hrai’ chu kho lian tak, buhhum tin hnih zet dawng a ni a.Chu chu hmanlaiin buh teh nan an chelek.Thil teh nan bera an hman a ni a.An thil tehna dan ber a nih avangin ‘dan leh hrai’ an ti a ni.

Entir nan:

(i)                          In lo chu hrai eng zat hmun nge?

(ii)                       In buh kan puk kha ‘dan-hrai’ thum a ni a, kan rul leh tawh ang che u, tiin hrai chu ‘dan-hrai’ tiin an sawi bawk thin.

·        (22) Ding leh vei : ‘Dinglam leh veilam’ tih atanga a tawng hi kal a ni na a, an tihna chhan ber chu ‘kut dinglam leh kut veilam’ hi niin lang mah se, a hmanna tak takah chuan engkima kan mi tangkaipui emaw, kan chhungte lam hnaite emaw pawh kan ‘ding leh vei’ an ni bawk.

Entir nan:

(i)                          Sapui um nikhua hi chuan fimkhur tak a ‘ding leh vei ’ a ni tak meuh a.

(ii)                       Anni chhung hizawng engkim kan ‘ding leh vei’ an ni, be chhe ngam rual em kan nih? ‘Leh’ tel lo pawhin ‘ka ding ka vei’ ti pawhin an hmang bawk.

·        (23) Dung leh vang : Dung lam leh vang lam sawina chu a ni tehmeuh a, a hmanna azirin a pumpui tih sawn nan an hmng bawk thin. Tin, hmunhma zim zawk dung leh vang nei leh nei chuang lo sawi nan hman a ni bawk.

Entir nan:

(i)                          In in ‘dung leh vang’ chu eng tiat nge?

(ii)                       Ani hi zawng ram ‘dung leh vang’ hmelhriat a ni a.

Tin, sawi dan azirin ‘a dung  a vang’ tingawt pawhin an hmang.

·        (24) Dum leh var : Mizo tawngkam kalphunga hman dan a ni.Sapho chuan ‘black and white’ an tih chuan ‘ziak’ tih sawi nan an hmang a.Mizo erawh chuan la hmang ve chiah lo mah se, khaw hmu fiah thei lote khaw hmuh dan sawi nan , ‘dum leh var pawh a hre hran lo,’ tiin an hmang.

Chhunzawm zel tur...>>>