Mizo Kan Nih Kan Lawm E - Rokunga (Editor Hla Thlan)

Hnam ropui leh hmingthangte chu dah tha ila,kan chheh vela kan tlangmipuite hian,heti taka Zofaten "Mizo" nih nuam an tih hi engtin nge an ngaih ang aw, tih hi ngaihtuah tham tak a ni a.An niho ngei pawh hian Zofaten "Mizo" nih nuam an tih ang tluk hian an hnam hmingah hian an lungawiin an lungdum ve ang em tih hi zawhna lian tak a tling awm e.

Heti taka  Mizo ten Mizo nih nuam kan tih hi a chhan sawi tur tam tak a awm thei ang a.Hla phuah thiam Rokunga hi a thawh hlawk ber pawl ni ngeiin a hriat a.

Tun tum kan hla thlan “Mizo Kan NIh Kan Lawm E” phuahtu pawh hi Mizo kan han inen a, kan nihna thalai ber min thlirtir tlattu,hreawm tinreng karah pawh Mizo nui hawr hawr min nihtir a, Mizo nih tinuamtu, Mizo thalaite hlim taka zaitirtu, “Poet of the Century” leh “Man of the Century” atana thlan, Mizo hnam pumpui ngaihsan leh ngainat em em Rokunga (1914 - 1969) phuah a ni. Rokunga hlate hi a Mizo reih mai a, sak a nuamin a hahdam a, hla thu harsa leh un pui pui a hmang ngai lova, mahse thu rill eh khun, thuk tak tak a paipawn kuh tul lawi si a ni.

Mizo kan ni kan lawm e,

Kan tlang a thiang bawk si;

Kan rilru pawh a sang e,

Kan hming a thang bawk si.

Kan ram, kan hnam dinchhuah nan,

Thinlung tithianghlimin,

Kan huai, kan fel, kan finna te,

Thiamin i hmang ang u.

Kan pi kan pu mi huaite

Dan tha kha mawi kan ti;

Thian chhan thih an ngam fo thin,

An hming a thang bawk si.

Keini’n chu dan chu zawmin

Huai taka din kan tum,

Mizo kan ni, kan hmel a tha

Kan tum a sang bawk si.

Chanchin Thain kan ramah,

Ramhuai a um bo ta;

Kan hnam dinchhuahna bul chu,

Hei ngei hi a lo ni,

Hnam dang hmusit mai lovin,

Thiana’n i siam ang u;

Chutin kan hming than mawina chuan

Khuavel a deng chhuak ang.