Mizo Hlakungpui Mual

“Hnam-hnuk” tia kan sawi chamchi Thu leh Hla lama kan pasalthate chawimawina atana buatsaih Mizo Hlakungpui Mual-ah (https://hlakungpui.com) donation a thawh theih tar eng mai.

Mizo Hlakungpui Mual Archive Building sak tur chu Plan & Estimate siam kal mek a ni a. Rs 30 - 40 lakhs inkara sak zawh tura ruahman a ni.He Archive Building hi Hlakungpui luahtute sulhnu, hmanrua, thawm hnaw, lehkhabu ziak, kut ziak leh thil dang dang dah khawmna tur a ni a.Tin, Library tha tawk tak Zo hnahthlâk thu leh hla chuan tawhna hrim hrim lehkhabu, article, kut ziak hlu leh pawimawh bik dahna tur chu a chuan-chungah zirlai, thu ziak mi, literature-a tui hrim hrim tân siam/dah tum a ni bawk 

Mizo Hlakungpui Mual chuan a lâwm a che!

‘A sakhmingah Hlakungpui an sa, Zofate Hnam Rolung Mual ni zel turin’ tih loh rual a ni lo. Zo hnahthlâk impumkhat tulzia hria leh mutmawh hnarmawha neite tân chuan an rilru dek zartute mitthla leh suangtuahnate hmun khata luan khawmtirtu ‘Mizo Hlakungpui Mual’ hi a vul zêl dawn. Mithiam , mifing, hawizau leh thil thlir thiam apiangin an hlut a, an rilru lûmtu a ni zêl. A hmun ngei a mita hmutu leh bêlchiangte chuan Khuannu’n kan ram tlâng panga zofate rilrem leh lungkuai tur thing leh mau pangpâr chitinte, tlâng dung khâm rang thliar sing sengte’n kan thu leh hla ril a lo pâr chhuahpui dân chu tupa fa mahin an hai lâwng nge. Chung zawng zawng chu tawngkaa sawi mai leh ziaka dah satliah mai chuan a thlarau chang ve lote a kaiharh zo lo fo. Chutiang ho thlarau kaiharh tur leh a thangharhsate nun chawk tho leh zual tur chuan he ’Mizo Hlakungpui Mual’ hi Mizo hnahthlâk hnam rolung mual atân din a lo ni ta a ni.

HLAKUNGPUI CHANCHIN TLANGPUI

A TO BUL:

Ram leh khawtlangin hma a sawn zel angin, kan tih ngai loh thil thar leh tha zawk a piang zel a. sualna a san poh leh hmasawnna pawh a pung emaw tih theihin thiamna pawh a sang zel a. Mizo fate ngei pawh mihuaisen, tlawmngai, rinawm leh ropui an piang chhuakin, thu leh hla-ah pawh an lo piang chhuak ve zel bawk a. A bik takin thu leh hla lama hrang hlui, pasal tha, sûl min lo sutsaktute hi an pawimawhin, hun lo la kal zel tur atan pawh ngaih hlut leh chawimawi an phua ngaiin Khawbung Branch YMA chuan engtianga hma lak tur nge ni ang tih a ngaihtuah ta a. Dt.13.01.1983 zâna Khawbung Branch YMA Committee chuan Committee thinlunga lo riak tawh chu kai harhin Thu leh Hla-a hranghlui pasalthate chawimawi chungchang chu Agenda-a neiin ngaihtuah tan a ni ta a. Committee chuan ngun taka ngaihtuahin thu leh hlaa Mizo pasaltha, hranghluite chawimawina lungphun leh an tana hmun buatsaih chu tha hlea ngaiin lungrual takin pawm tlân a ni a. A hmasa ber atân Khawbung khawchhuak pahnih – Hlakungpui-te Pu Patea leh Pu Damhauva-te chu bul tan nan hman nise tiin rel a ni a. Ni 16.9.1983 leh ni 28.10.1983-ah an chhungte phalna lâk fel a nih thu Committee-ah thlen a ni (An ruh pawh seng luh a ni). Hemi tipuitling tura hmalakna hi Khawbung Branch YMA leh a khawchhuakte’n neitu chanchanging bul tan a ni a. Kum 1986 April 7 & 8-ah Hlakungpui-te chawimawi-na lungphun a ni.

THIL TUM:

Mizo fate – hnam leh thlah thumhmun kan nihna ang a, ram bik kan neih chhung leh pawn lama mite tana kan hnam rohlu Thu leh Hlaa pasal tha leh hranghluite chawimawi leh an tana hmun bik ruat/siam a ni a. Hetah hian kum 10 dan emaw, Silver/Golden Jubilee etc., hun bîk remchang anga chawimawina siam thin tur a ni. Tin, Hlakungpui Mualah hian Mizo fa/Mizo hnahthlâk tawh phawt chu chawimawitlâka kaihhruainain a ruat leh phalte chu chawimawi zel tur a ni a; chuvangin ‘Mizo Hlakungpui Mual’ tih a ni. Mizo Hlakungpui mual hi tunah Khawbung Branch YMA-in a enkawlna chungchangah mawh latu ni mah se, Mizo tawh phawt a neitu a piang ta a ni tih hi Mizo mipui zawng zawngin hria ila. Mizo thu leh hla-a pasaltha kan neih Mizoram leh khawvel hriata kan pho chhuah a, kan chawimawi a; kan hlut tlân theuh hi Mizo fa tawh phawt chuan kan mawhphurhna a ni e.

HLAKUNGPUI MUAL LUAH TURTE THLAN DAN CHUNGCHANG:

Hlakungpui muala thu leh hla pasaltha chawimawi/seng luh tur thlan chungchangah hetiang hian kaihhruaina (criteria) siam a ni:

Thu : An thu ziak 3/4 chul lova kan neihte (mi thinlunga nung reng).
Hla : An hla 4/5 tal chul lova Mizote thinlunga nung reng.
A huam chin : Hla phuah thiam/Thuziak mite hi an thih atanga kum nga a ral phawt loh chuan Hlakungpui Mual-ah seng luh theih a ni lo.

Kum sâwm danah Committee-in uluk taka a ngaihtuah hnuah chawimawi tur awm ang angte chu seng luh an ni thin. Silver/Golden Jubilee etc, ah chuan a lawm dan Committee-in a rel thin ang.
Tunah hian — 1986, 1996 leh 2006-ahte chawimawina siam a ni tawh a, Thu-ah mi 12 leh Hla-ah 17 seng luh tawh an ni.