Minister-in Residential Commissioner khak

14/04/2010 15:54

Delhi Mizoram House-a Residential Commissioner, SP Singh chu thuneitu sang zawkte'n an khak hnuah pawh Mizote lakah a inluling zel nia sawi a ni a, a lakah hian Minister Lalrinliana Sailo pawh a lungawi loh avangin Minister hian April 12, Thawhtanni khan na takin a khak nia thu dawn a ni.

Thu dawnna chuan, SP Singh hian Mizote a ngaipawimawh lo a, Mizote lakah a inluling thin a, a hnuaia thawkte pawh a lakah an lungawi vak lo thin niin a sawi. Mizoram sorkar hotute pawh a ngai pawimawh tâwk lo a, Chief Minister leh Chief Secretary-te bak chu Minister, Speaker leh Mizoram sorkara hotu dangte pawh Delhi-a an zinin a ngaihsak ngai loh bakah, sorkar laipuia hotute an dàwr dawn pawhin motor a ruahmansak tha duh lo a, Mizoram sorkar thil bawhzui ngai pawh a bawhzui lo fo nia sawi a ni a; hengte avang hian Minister-te leh sorkar hotu dangte pawh an lakah an lungawi lo hle a, Chief Minister pawh a lawm vak lo niin thudawnna chuan a sawi bawk.

Tun hnaia Health Minister zin pawh SP Singh hian a lo dawngsawng tha lo a, hei vang hian Minister lungawi lo chuan, "In tihtur in ti lo. Mizoram State House a nih hi, i inlulinna tur a awm lo," tiin a khak a; hemi hnu hian SP Singh hian Chief Minister hnenah insawifiahna a thawn nia thu dawn a ni.

Thulakna: Vanglaini

Back