MANIPUR ATANGIN HNAM DANG CHHUAK TURIN HRIATTIR

09/03/2010 14:56

Dan pawna hnawl, Revolutionary People’s Front (RPF) chuan May 31, 2010 hma ngeiin Manipur state atang chuan hnamdang, non-Manipuri, kum 1949 hnulama awmhmun bengbelte chu chhuak turin a hriattir. He hriattirna hian Manipur-a zirna vanga awm leh awm lailawkte erawh chu a huam tel lo a ni.

RPF publicity secretary, T. Leishemba chuan Manipur-a hnam dang awmte chu dan kalha awm vek a ni tih sawiin, an state chhunga an luh chu khap a nih thu a sawi. Non-manipuri tan chuan an state-ah chuan ralmuang taka awm a theih loh a ni a ti.

State sorkar chuan thil thalo thleng thinte a dang thei lo a, hetihlai hian RPF thiantha tak pawh ni se, hnam dang an nih chuan an pawl chuan an tanpui thei lo a ni tiin, anmahni himna leh thatna zawk turin non-Manipuri-te chu Manipur state atanga chhuak vek turin an ngen a ni.

RPF chuan an state-a hnam dang awm, eizawnna hnuaihnung atanga a sang ber thlenga thawkte chu hna awm thei chi hrang hrangah an intatlut a, Manipur economy, khawtlang nun leh politics-te an thununna hnuaia dahin hei hian a leilung fate zingah lungawilohna leh lungruallohnate a thlen phah a ni a ti.

Thulakna:Vanglaini

Back