Manipur-ah thil man sang deuh deuh, kawngpui dangtu manna thupek tichhuak

April 12 atanga Manipur pawhtu kawngpui pawimawh pahnih dangtu, All Naga Students' Association Manipur leh United Naga Council hruaitu pahnihte chu June 5 khan Manipur sorkar chuan a mi man duh, 'wanted'-ah a puang.

Manipur sorkarin 'wanted'-a a puante hi ANSAM acting president David Choro (38) leh UNC acting President Samson Remei (50)-te an ni. Manipur sorkarin wanted an nih thu a puan hma hian, Gauhati High Court chuan heng mi pahnihte manna tur thupek hi a lo tichhuak tawh bawk.

DGP Y Joy Kumar chuan heng mi pahnihte man an nih theihna atana chanchin hrilh theitu hnenah Rs nuai khat pek an nih tur thu a puang.

Pawl pahnihte hian Manipur hills district-a Autonomous District Councils (ADCs) election neih tur an duh loh vang leh, Manipur sorkarin NSCN-IM hruaitu, T Muivah an state-a a luh a phalsak loh avanga lungawiloin, April 12 atang khan NH-39 (Imphal-Dimapur) leh NH-53 (Imphal-Jiribam) an dang tawh a ni.

UNC chuan Manipur sorkarin ANSAM leh  UNC hruaitute manna tur thupek a tichhuak chu sut leh nghal turin an phut. UNC thuchhuah chuan, 'Sorkarin manna tur thupek, June 5-a a tihchhuah hi ni nga chhungin a sût leh ngei tur a ni' a ti. He thupek hi sût a nih loh chuan kawngpui an dan chu a hma aia nasa zawka chhunzawm lehah a vau nghal a ni.

Hetihlai hian Thawhlehni zing dar 5 atang khan All Assam Manipur Students' Union hnuaia pawl 12 intelkhawmten an din, Joint Action Committee chuan Nagaland pawhtu kawngpui, NH 39 (Numaligarh- Dimapur) leh NH 36(Nagaon - Dimapur) chu darkar 36 chhung atan an dan gbawk. JAC hian Nagaland state chhunga nitin khawsaknaa mamawh leh tuialhthei phurtu truck-te an dang a ni. ANSAM leh UNC-ten Manipur kawngpui an dan mek an tihtawp loh chuan anni pawhin a tul dan azirin Nagaland kawngpui an dan chu an pawtsei dawn tih JAC chuan a sawi.

Tunah hian Manipur-ah thil man a sang hle tawh a,thla hmasaa 50 kilogram buhfai bag khat Rs.800 kha tunah  Rs.1,350 a ni a.Thla hmasaa gas bur khat Rs.300 kha tunah Rs.1,500 a ni.Thil man a to bakah lei tur awm lo a awm nual tan a ni.

Thulakna: The Irrawaddy , Vanglaini